मन्त्रालय भागवण्डा नमिल्दा सरकारमा नजाने नेपालको चेतावनी

१९ असोज, काठमाडौं । अस्पतालबाट सोमबार मात्रै घर आएका पूर्व प्रधानमन्त्री माधवकुमार नेपालसँग माओवादी केन्द्रका अध्यक्ष पुष्पकमल दाहाल ‘प्रचण्ड’ले सरकार विस्तारको बारेमा परामर्श गरेका छन् ।

सत्ता गठवन्धन दलहरुले नै अलमल गरिरहेका बेला माओवादी केन्द्रका अध्यक्ष प्रचण्ड र नेकपा ‘एकीकृत समाजवादी’का अध्यक्ष नेपालवीच सरकारलाई पूर्णता दिनेबारे छलफल भएको हो ।

प्रधानमन्त्री शेरबहादुर देउवाले सत्ता गठबन्धन दलसँग मन्त्रीहरुको सूची मागेपनि भनेजस्तो मन्त्रालय नपाए सरकार नजानेभन्दै माधव नेपालको पार्टीले अडान राखेपछि आज विहानै दुई अध्यक्षबीच भेटघाट भएको हो ।

५ दिन त्रिवि शिक्षण अस्पतालमा भर्ना भइ उपचाररत नेकपा एकीकृत समाजवादीका अध्यक्ष नेपाल सोमबार अस्पतालवाट डिस्चार्ज भएपछि प्रचण्ड–नेपालवीच भेटवार्ता भएको हो । प्रधानमन्त्री शेरवहादुर देउवाले मन्त्रिहरुको नाम पटक–पटक दिन आग्रह गरेपनि सत्ता गठवबन्धन दलभित्र मन्त्रालय भागवन्डा मिल्न नसक्दा मन्त्रिपरिषद विस्तारमा ढिलाई हुँदै आएको छ ।

यद्यपी, आइतबार गठवन्धन दलभित्रका कार्यदल तहमा मन्त्रालय भागवन्डा लगायत अन्य राजनीतिक नियुक्तिहरुका विषयमा केन्द्रीत रहेर छलफल भएपनि त्यहाँ पनि सहमति बन्न सकेन । ‘दलहरुबीच असमझदारी उत्पन्न भएको छ त्यो बाहिर आएको छैन’, गठबन्धन निकट एक नेताले भने । माधव नेपालले आफूले भनेजस्तो मन्त्रालय नपाए सरकारमा नजाने बताइसकेका छन् ।

चुनावसम्मकै गठबन्धन कायम गर्ने गरी बनेको यो सरकारमा नेपाल पक्षले मन्त्रालय भागवण्डाको विषयमा असन्तुष्टि जनाएपछि देउवाले सरकार विस्तार गर्न सकेका छैनन भने प्रचण्ड अप्ठेरोमा परेका छन् ।

प्रचण्डले सोमबार मात्रै नेता नेपाल अस्पतालवाट डिस्चार्ज भएपछि सोमबार साँझसम्म सम्भवत मन्त्रिपरिषद विस्तार हुने पार्टी निकट वुद्दिजिवि संगठनको राष्ट्रिय भेलामा बताएका थिए । माधव नेपालको निवास कोटेश्वरमै नेपालसँग भेट गर्न पुगेका प्रचण्ड मन्त्रिपरिषद विस्तारमा अव ढिलाई गर्न नहुने पक्षमा छन् ।

उनले आजै प्रधानमन्त्रीसँग पनि यस विषयमा कुरा गरेर आफनो पार्टीका तर्फबाट भने साँझ सम्ममै नाम टुग्गो लगाई प्रधानमन्त्रीलाई बुझाउने तयारी गरेको माओवादीका एक स्थायी कमिटि सदस्यले जानकारी दिए ।

सोमबार प्रचण्डसँग प्रधानमन्त्री देउवाका प्रतिनिधीका रुपमा कानुनमन्त्री ज्ञानेन्द्रवहादुर कार्कीले खुमलटारमै पुगेर भेटवार्ता गरेका थिए । त्यसपछि साझ नै प्रधानमन्त्री देउवा र माओवादी केन्द्रका अध्यक्ष प्रचण्डका वीचमा बालुवाटारमा भेटवार्ता पनि भएको थियो ।

झण्डै ढेड घण्टा प्रधानमन्त्री र प्रचण्डका वीचमा भेटवार्ता भएपछि आज बिहानै प्रचण्ड सत्ता गठवन्धनकै अर्को दल नेकपा एकीकृत समाजवादीका अध्यष माधव नेपालसँग भेटवार्ताका लागि पुगेका हुन् । दलहरुका वीचमा आन्तरिक परामर्श गर्ने र सम्भवभएसम्म आजै साँझ नभएपनि भोलि सम्म मनित्रपरिषद विस्तार गर्ने योजनामा सत्ता गठवन्धन दलका नेताहरु जुटेका हुन् ।

दशैंमा नव निर्वाचित मन्त्रीहरुलाई स्वागत गर्ने गरी सरकारले पर्सि बिहिवार घटस्थापना अगाडी नै मन्त्रिपरिषद विस्तारको काम लाई पूर्णता दिने गरी अगाडी वढेको मन्त्रालय भागवण्डामा कुरा मिलेको छैन । मन्त्रालय भागवण्डामा विवाद भएपछि उपेन्द्र यादवले पनि सरकारमा नजाने बताइरहेका छन् ।

अहिले दुईवटा मन्त्रालय सम्हालिरहेको माओवादीले अब तीन मन्त्री र एक राज्यमन्त्री पाउने भएको बताइएको छ । सोमबार बेलुका बालुवाटारमा प्रधानमन्त्री देउवा र माओवादी अध्यक्ष प्रचण्डबीच भएको छलफलबाट मन्त्रालयहरुको मोटामोटी टुंगो लागेको माओवादीका एक नेताले बताएपनि उपेन्द्र यादवले भने अनभिज्ञता प्रकट गरिरहेका छन् ।

यसअघि अर्थ र उर्जा मन्त्रालय पाइसकेको माओवादीले पाँच मन्त्री र एक राज्यमन्त्री पाउने टुंगो लागेको ती नेताले बताए । देउवा र प्रचण्डबीच सोमबार मोटामोटी टुंगो लागेको भएता पनि मंगलबार शीर्ष नेताहरुको बैठक बसेर मन्त्रालयको भागवण्डालाई अन्तिम रुप दिइने जनाइएको छ ।

मन्त्रालयको भागवण्डा मिलेपछि दलहरुले आ–आफ्नो पार्टीमा छलफल गरेर मन्त्रीको नाम टुंगो लगाउने नेताहरुले बताएका छन् माओवादीबाट मन्त्री बन्नेहरुको नाम लगभग टुंगो लागिसकेको बताइएको छ । माओवादी पाउने चार मन्त्रालयमा देवेन्द्र पौडेल, अञ्जना बिसंखे र महेश्वर गहतराजको नाम बढी चर्चामा छ ।