३० आश्विन २०७८, शनिबार

मुलुकलाई संकटबाट उतार्न कांग्रेस नेतृत्व आवश्यकः मुख्यमन्त्री पोखरेल

प्रकाशित मिति :  २२ आश्विन २०७८, शुक्रबार ११:४७


२२ असोज, गण्डकी । गण्डकी प्रदेशका मुख्यमन्त्री कृष्णचन्द्र नेपाली पोखरेलले मुलुकका हरेक संकटमा नेपाली कांग्रेसमाथि थप जिम्मेवारी आउने गरेको बताएको छ ।

नेपाली कांग्रेस पोखरा महानगर समितिले दसैँ, तिहार, नेपाल संवत्, छठ तथा इदको अवसरमा बिहीबार आयोजित चियापान तथा शुभकामना आदान–प्रदान कार्यक्रममा उनले गत चुनावमा कम्युनिष्टले दुईतिहाइ ल्याएपछि कांग्रेस निर्धक्कसँग प्रतिपक्षमा बसेको र उनीहरुबीचकै कलहले संवैधानिक संकट निम्तिएपछि कांग्रेसले अघि सर्नुपरेको बताए ।

उनले कांग्रेस प्रतिपक्षमा बस्दा पनि रचनात्मक भूमिका खेलेको स्मरण गरे । विसं २०६४ को चुनावमा माओवादी ठूलो पार्टी बने पनि संविधानसभाले संविधान दिन नसक्दा कांग्रेसले नै अग्रसरता लिनुपरेको उल्लेख गर्दै उहाँले विगतका घटनाले आफूहरूलाई पाठ सिकाएको र विकास तथा समृद्धिका लागि कांग्रेसकै नेतृत्व आवश्यक पर्ने गरेको बताए ।

कांग्रेस १४औँ महाधिवेशनमा लागिरहँदा वडा, पालिका र हिमाली जिल्लामा चुनाव भइसकेकाले उनले अब पार्टीलाई थप सशक्त बनाउनुपर्नेमा जोड दिए । पार्टीभित्र हुने आन्तरिक लोकतन्त्रका लागि चुनावी प्रक्रिया अपनाइए पनि यसलाई सहजरूपमा लिन उनले कार्यकर्तासँग आग्रह गरे ।

नगर सभापति सुरेन्द्र बिजुक्छेले कांग्रेस संस्थापक बिपी कोइरालाले सुरु गरेको चियापान समारोहलाई जिल्ला र पालिकास्तरसम्म पनि निरन्तरता दिइएको बताए । कांग्रेस कास्कीको चिप्लेढुङ्गास्थित पार्टी कार्यालयमा भएको कार्यक्रममा मन्त्रीद्वय कुमार खड्का, बिन्दुकुमार थापा, पार्टीका पूर्वमहामन्त्री तारानाथ रानाभाट, पूर्वमन्त्री यज्ञबहादुर थापा, शुक्रराज शर्मा, महादेव गुरुङ, कास्की सभापति कृष्ण केसीलगायतको उपस्थिति थियो ।

‘गाउँ–गाउँमा खेलकुदका पूर्वाधार’

गण्डकी प्रदेशका युवा तथा खेलकुदमन्त्री राजीव गुरुङले प्रदेशभित्र गाउँ–गाउँमा खेलकुदका भौतिक पूर्वाधार विकास गर्दै खेलकुदलाई प्राथमिकता दिइने बताएको छ । युनाइटेड युथ क्लब रिसान थालाजुङ गोरखाद्वारा आयोजित शुभकामना आदानप्रदान तथा खुला फुटबल प्रतियोगिताको बिहीबार उद्घाटन गर्दै उनले मन्त्रालयले सबै विधाका खेलाडीलाइ प्रोत्साहन गर्दै राष्ट्रिय तथा अन्तर्राष्ट्रिय प्रतियोगितामा गण्डकी प्रदेशका खेलाडीले राम्रो नतिजा ल्याउन अभिप्रेरित गर्ने बताए ।

प्रदेशभित्रका सम्पूर्ण गाउँका खेलमैदानको अवस्था निरीक्षण गरी भौतिक पूर्वाधार भत्केका, बिग्रेका र अहिलेसम्म प्रयोगमा आउन नसकेका खेलमैदानको पुनःनिर्माण गर्ने उनले बताए । राम्रो खेलमैदान भएपछि खेलाडीलाई प्रोत्साहन हुने र यसले राम्रो नतिजा ल्याउने उनको भनाइ छ ।

मन्त्री गुरुङले खेलका लागि आवश्यक फुटबल, भलिबल, नेट जालीलगायतका सामग्री जिल्लाका विभिन्न क्लबका अध्यक्ष तथा खेलाडीलाई हस्तान्तरण गरे । यही असोज २६ गतेसम्म चल्ने फुटबल प्रतियोगितामा चितवन, काठमाडौं, लमजुङ, तनहुँलगायत जिल्लाबाट २१ टोलीको सहभागिता रहेको युनाइटेड युथ क्लब रिसान थालाजुङका अध्यक्ष रामकुमार गुरुङले जानकारी दिए ।


नेपालबहस डटकमको अंग्रेजी संस्करणका साथै अनलाइन टिभी पनि सञ्चालित छ । फेसबुक र ट्वीटरमार्फत पनि हामीसँग जोडिन सकिनेछ । नेपालबहसमा प्रकाशित कुनै सामग्रीबारे कुनै गुनासो, सूचना तथा सुझाव भए हामीलाई [email protected] मा पठाउनु होला । धन्यवाद ।
प्रतिक्रिया दिनुहोस !
छुटाउनुभयो कि?
ताजा