रुपन्देही झडप : गोली लागेर घाइते भएका तीन जनाको मृत्यु

२४ असोज, काठमाडौं । रुपन्देहीको मोतिपुर औद्योगिक क्षेत्रमा सुकुम्बासी समूहसँगको झडपमा  प्रहरीले गोली चलाउँदा तीन जनाको मृत्यु भएको छ । गोली लागेर घाइते भएकामध्ये तीन जनाको मृत्यु भएको हाे ।

उनीहरूको युनिभर्सल कलेज अफ मेडिकल साइन्सेज भैरहवामा मृत्यु भएको अस्पताल प्रशासनले पुष्टि गरेको छ। मृत्यु हुनेहरूको पहिचान खुलिसकेको छैन। झडपका क्रममा ५० जना भन्दा घाइते भएका थिए ।

नेपालबहस डटकमलाई प्रहरी उपरीक्षक मनोज केसीले दिएको जानकारी अनुसार रुपन्देहीको मोतीपुर औद्योगिक क्षेत्रको जग्गामा बसोबास गर्ने सुकुम्बासी समूहसँगको झडपपछि उत्पन्न परिस्थितिलाई सामान्य बनाउन स्थानीय प्रशासनले लगाएकाे कर्फ्यू जारी छ ।

प्रहरी उपरीक्षक केसीका अनुसार झडपपछि  प्रशासनले कर्फ्यू आदेश जारी गरेको बताइएकाे छ । केसीका अनुसार अहिले घटनास्थलमा प्रहरीको सहभागिता बाक्लो रहेको छ ।

निर्माणाधीन मोतीपुर औद्योगिक क्षेत्रमा क्षेत्रमा रहेका सुकुमबासी र प्रहरीबीच आइतबार झडप भएको थियो। स्थितिलाई नियन्त्रणमा लिने क्रममा प्रहरीले गोली चलाउँदा केही घाइतेसमेत भएका छन् । आइतबार ४ बजेदेखि अर्को सूचना जारी नभएसम्म प्रशासनले कर्फ्यु आदेश जारी गरेको हो।

प्रशासनले पूर्वमा तिनाउ नदी बुटवल उपमहानगर १७ देखि वडा नम्बर १८ सौंरहिया पुलसम्म, पश्चिम हरिहरपुरको खेतीयोग्य जमिन वडा नम्बर १७, उत्तर शिवनगर रानीगन्ज बस्ती वडा नम्बर १७ र दक्षिण बुटवल महानगरपालिका वडा नम्बर १८ औद्योगिक करिडोरको जमिन धन्दापुर सौंरहियासम्मको क्षेत्रमा कर्फ्यु जारी छ ।