तास खेल्नकै लागि २८ करोड रुपैयाँ खर्च !

३१ असोज, काठमाडौं । तपाई हामी सबैलाई थाहा छ । हामी हाम्रा आवश्यकताका सामान किन्न जति पनि खर्च गछौँ । अझै हामीलाई मन परेको सामान देखेपछि जति परेपनि खर्च गछौँ ।

तर नेपालीले तास खेल्नकै लागि २८ करोड रुपैयाँ खर्च गरेका छन् । गत आर्थिक वर्षमा नेपालीले तास मात्रै २८ करोड रुपैयाँको किनेका हुन् । भन्सार विभागको अनुसार गत आर्थिक वर्षमा मात्रै २८ करोड ६२ लाख ६४ हजार रुपैयाँको तास नेपाल भित्रिएको हो ।

विशेषगरी दसैं, तिहार जस्ता चार्डपर्वमा तासको माग बढ्ने गरेको छ । गत वर्षको असोज महिनमा मात्रै नेपालीले ४ करोड रुपैयाँ बराबरको तास किनेका थिए ।गत वर्षको पहिलो दुई महिना अर्थात साउन र भदौमा ३ करोड ४२ लाख रुपैयाँ बराबरको तास आयात भएको थियो। यस वर्ष पनि गत साउन र भदौ महिनामा मात्रै साढे ५ करोडको तास आयात भएको छ ।

यसरी आउने तास अधिकांश भारत, चीन र अमेरिकाको छ । नेपालमा नै पर्याप्त उत्पादन नहुँदा वर्षेनी करोडौं रुपैयाँ विदेशिँदै आएको छ । भन्सार विभागको तथ्यांक अनुसार सबैभन्दा धेरै तास चीनबाट आउने गरेको छ । त्यसपछि क्रमशस् अमेरिका, भारत, जर्जियाबाट आउने गरेको छ ।