प्रधानन्याधीशलाई गोला प्रथाबाट पेशी तोक्न बार एसोसिएसनको १५ दिने अल्टिमेटम

५ कार्तिक, काठमाडौं । नेपाल बार एसोसिएसनले न्यायाधीस हरिकृष्ण कार्की संयोजकत्वको समितिले दिएको सुझाव कार्यान्वयनका लागि १५ दिनभित्र प्रतिवद्धता जनाउन प्रधानन्यायधीश चोलेन्द्रशम्शेर राणालाई अल्टिमेटम दिएको छ ।

कार्की संयाजकत्वमा गठित समितिले पेश गरेको प्रतिवेदन लागू गर्ने सम्बन्धमा प्रधानन्यायाधीसले प्रतिवद्धता जनाएको स्थितिमा दुई महिनासम्म पनि सर्वोच्च अदालत फूलकोर्टबाट निर्णय गराइ लागू गराउनेतर्फ तदारुकता नदेखाएको बारले जनाएको छ ।

उक्त प्रतिवेदन तत्काल लागू गराउने समयसीमासहितको प्रतिवद्धता सर्वोच्च अदालतबाट १५ दिनभित्र नआएमा नेपाल बार एशोसिएशनले न्यायिक नेतृत्वलाई विश्वास गर्न सकिने अवस्था रहँदैन ।’– बार महासचिव अधिवक्ता लिलामणी पौडेलद्वारा शुक्रबार जारी विज्ञप्तिमा भनिएको छ । गोलाप्रथाबाट पेशी तोक्नपर्ने प्रावधान लागू गर्न बारले माग गरेको हो । सो सम्बन्धमा बार कार्यसमितिले कात्तिक ७ गते प्रधानन्यायाधीसलाई भेटेर छलफल गर्ने र उक्त छलफलपछि मात्रै थप निर्णय लिने बारको शुक्रबारको बैठकले निर्णय गरेको महासचिव पौडेलले बताए ।

पाँच सात वर्षअघिदेखि न्यायिक शुद्धता, निश्पक्षता कायम राख्न र विकृति विसंगति हटाउने विभिन्न उपायहरु मध्ये अदालतको पेशी ब्यवथापन र इजलास गठनका सम्बन्धमा भइरहेको ब्यवस्थाबाट कतिपय गलत कार्यहरु भएकोले सोको सट्टामा स्वचालित पेशी प्रणाली लागू गराउन र स्वचालित पेशी प्रणाली लागू गर्न प्राविधिक रुपले केही समय लाग्ने भएमा सबै अदालतहरुमा गोला ‘राफल’ प्रणालीबाट पेशी तोक्न भनी नेपाल बार एशोशिएसनले सुझाव दिएको थियो ।