धनुषा र सर्लाहीका विवादित एसपीको सरुवा

७ कार्तिक, काठमाडौं । प्रहरी प्रधान कार्यालयले धनुषा र सर्लाहीमा नयाँ एसपी पठाएको छ । लागूऔषध मुद्धामा चलखेल गरेको आरोप लागेका र प्रमुख जिल्ला अधिकारीसहितसँग बसेर जुवा खेल्ने जिल्ला प्रहरी कार्यालय धनुषा र सर्लाहीका एसपीको काज सरुवा गरेको हो ।

प्रधान कार्यालयले धनुषामा कार्यरत एसपी प्रकाश रानाभाट र सर्लाहीमा कार्यरत एसपी सन्तोषसिंह राठौरको काज सरुवा गर्दै उनीहरुलाई प्रहरी प्रधान कार्यालय तानेको स्रोतले जनाएको छ ।

प्रहरी प्रधानकार्यालयले उनीहरुको स्थानमा प्रहरी प्रधान कार्यालयमा रहेका एसपी बसन्त रजौरेलाई धनुषा र प्रदेश २ प्रहरी कार्यालय जनकपुरमा रहेका एसपी कृष्ण प्रसाईलाई सर्लाही पठाएको छ ।

एसपी रानाभाटले लागूऔषध मुद्धामा गत फागुजनमा पक्राउ परेका आरोपीहरुको मिसिल कमजोर बनाएको आरोप लागेको थियो । यस बिषयमा प्रहरी प्रधान कार्यालयले अनुसन्धान गरिरहेको जनाएपछि त्यसको परिणाम भने अहिलेसम्म सार्वजनिक गरिएको छैन् ।

एसपी रानाभाटले गत असारमा लागूऔषध मुद्दाको मिसिल फेरबदल गरेर लाभ लिन खोजेको आरोप लागेको थियो । उनले लागूऔषध मुद्दा कमजोर बनाउन खोजेको भन्दै प्रहरी प्रधान कार्यालयमा उजुरी परेपछि छानविन नै भएको थियो ।

२०७७ फागुन ८ गते धनुषा प्रहरी मातहत रहेको इलाका प्रहरी कार्यालय महेन्द्रनगरले बटेश्वरबाट प्रतिबन्धित लागुऔषध नाइट्रोजन भ्याटसहित तीन जनालाई पक्राउ गरेको घटनामा एसपी रानाभाटले मिसिल नै परिवर्तन गरेर मुद्दा कमजोर बनाउन खोजेको भन्दै प्रहरी प्रधान कार्यालयमा उजुरी परेको थियो ।

लागूऔषधसहित पक्राउ पर्नेहरुमा महोत्तरीको मनरासिसवा नगरपालिका–२ बस्ने २१ वर्षीय केशव सिंह, २० वर्षीय रोशन ठाकुर र २० वर्षीय सहिल सिंह रहेका थिए । त्यसैगरी सर्लाहीका एसपी राठौरले कार्यालयमै तास खेलेको भिडियो सार्वजनिक भएको थियो ।