आधा दर्जन लघुवित्त कम्पनीले गरे पहिलो त्रैमासको वित्तीय विवरण सार्वजनिक, अधिकांश सूचकमा प्रगति

११ कार्तिक, काठमाडौं । आधा दर्जन लघुवित्त कम्पनीले चालु आर्थिक वर्षको पहिलो त्रैमासको वित्तीय विवरण सार्वजनिक गरेका छन् । वित्तीय विवरण सार्वजनिक गर्ने अधिकांश लघुवित्तको मुनाफा बढेको हो ।

हालसम्म मिर्मिरे लघुवित्त, फस्र्ट माइक्रोफाइनान्स, एनआईसी एशिया लघुवित्त, साधना लघुवित्त, डिप्रोक्स लघुवित्त र सीवाई नेपाल लघुवित्तले पहिलो त्रैमासीक विवरण सार्वजनिक गरेका छन् ।

मिर्मिरे लघुवित्त वित्तीय संस्था लिमिटेड

मिर्मिरे लघुवित्त वित्तीय संस्था लिमिटेडले चालु आर्थिक वर्षको पहिलो त्रैमाससम्म ६ करोड ३७ लाख ६१ हजार रुपैयाँ मुनाफा आर्जन गरेको छ। यो गत आर्थिक वर्षको सोही अवधिको तुलनामा १९३.३३ प्रतिशत बढी हो। गत आर्थिक वर्षको सोही अवधिसम्ममा लघुवित्तले २ करोड १७ लाख रुपैयाँ मुनाफा आर्जन गरेको थियो।

लघुवित्तको ब्याज आम्दानी ११५.७१ प्रतिशत बढेको छ भने सञ्चालन मुनाफा १९३.३३ प्रतिशत बढेको छ। समीक्षा अवधिमा लघुवित्तको चुक्ता पूँजी ८.१३ प्रतिशत बढेको छ भने जगेडा कोष १७०.७६ प्रतिशत बढेको छ। त्यसैगरी, लघुवित्तको सापटी ९२.७३ प्रतिशत र निक्षेप ३७.०८ प्रतिशत बढेको छ भने कर्जा ७४.५० प्रतिशत बढेको छ।

लघुवित्तको प्रतिशेयर आम्दानी २१ रुपैयाँ ६१ पैसाबाट ३७ रुपैयाँ १ पैसा बढेर ५८ रुपैयाँ ६२ पैसा पुगेको छ। असोज मसान्तसम्ममा लघुवित्तको मूल्य आम्दानी अनुपात २५.७४ गुणा रहेको छ भने प्रतिशेयर नेटवर्थ १९४ रुपैयाँ ६५ पैसा रहेको छ।

सिवाईसी नेपाल लघुवित्त

सिवाईसी नेपाल लघुवित्त वित्तीय संस्थाले २ करोड ७२ लाख ८५ हजार मुनाफा गरेको छ । लघुवित्तले यस अवधिमा अधिल्लो वर्ष १ करोड २६ लाख रुपैयाँ मात्र मुनाफा गरेको थियो ।

पहिलो त्रैमासमा कम्पनीको ब्याज आम्दानीमा वृद्धि भएकाले र ३ करोड ८० लाख ७७ हजार खराब कर्जा उठाउन कम्पनी व्यवस्थापन सफल भएकाले नाफा बढ्न टेवा पुगेको हो ।

चुक्तापूँजी ८ करोड २१ लाख रहेको उक्त कम्पनीले जगेडामा १२ करोड १२ लाख ३१ हजार सञ्चित गरेको छ ।
चालू आवको पहिलो त्रैमाससम्ममा कम्पनीले ५९ करोड ५४ लाख सापटि लिएर, ९७ करोड १२ लाख ५० हजार निक्षेप संकलन गरेर २ अर्ब २२ करोड कर्जा लगानी गरेको छ ।

फर्स्ट माइक्रोफाइनान्स लघुवित्त

फर्स्ट माइक्रोफाइनान्स लघुवित्त वित्तीय संस्था लिमिटेडले पहिलो त्रैमाससम्म २ करोड ९६ लाख रुपैयाँ मुनाफा आर्जन गरेको छ। जुन गत वर्षको यही अवधिको तुलनामा ०.२ प्रतिशतले कम हो। गत वर्ष यही अवधिमा संस्थाले २ करोड ९७ लाख रुपैयाँ मुनाफा आर्जन गरेको थियो।

समीक्षा अवधिमा संस्थाले ४ करोड ७० लाख रुपैयाँ सञ्चालन मुनाफा आर्जन गरेको छ। जुन गत वर्ष यही अवधिमा ४ करोड ७१ लाख रुपैयाँ रहेको थियो।

यो अवधिमा संस्थाको खुद ब्याज आम्दानी गत वर्षको यही अवधिको तुलनामा ९.१७ प्रतिशतले घटेको छ। गत वर्ष ५ करोड २७ लाख रुपैयाँ खुद ब्याज आम्दानी गरेकोमा समीक्षा अवधिमा घटेर ४ करोड ७९ लाख रुपैयाँमा सीमित बनेको छ।

संस्थाले ९ अर्ब ६६ करोड रुपैयाँ सापटी लिई ९ अर्ब ३३ करोड रुपैयाँ कर्जा परिचालन गरेको छ। गत वर्ष ५ अर्ब ९४ करोड रुपैयाँ सापटी लिई ६ अर्ब ३ करोड रुपैयाँ कर्जा परिचालन गरेको थियो।

चुक्तापुँजी ९६ करोड ४४ लाख रुपैयाँ रहेको संस्थाको प्रतिशेयर आम्दानी १२.३० रुपैयाँ रहेको छ। मूल्य आम्दानी अनुपात ७३.६० गुणा रहेको संस्थाको प्रतिशेयर नेटवर्थ १२१.११ रुपैयाँ रहेको छ।

एनआईसी एसिया लघुवित्त

एनआईसी एसिया लघुवित्तले पहिलो त्रैमाससम्म १६ करोड २६ लाख ७५ हजार रुपैयाँ मुनाफा गरेको छ । उक्त मुनाफा गत वर्षको तुलनामा १५०.५१ प्रतिशतले बढि हो । गत वर्ष लघुवित्तले ६ करोड ४९ लाख ३७ हजार रुपैयाँ मुनाफा गरेको थियो ।

यस अवधिमा लघुवित्तको ब्याज आम्दानी १०३.१० प्रतिशतले बढेर ३५ करोड ११ लाख ८५ हजार रुपैयाँ पुगेको छ । अघिल्लो वर्ष यसैअवधिमा यसले १७ करोड २९ लाख ११ हजार रुपैयाँ खुद ब्याज आम्दानी गरेको थियो । साथै, सञ्चालन नाफा पनि १४९.९२ प्रतिशतले बढेर २५ करोड ८१ लाख २२ हजार रुपैयाँ पुगेको छ । अघिल्लो वर्ष यसले १० करोड ३२ लाख ८० हजार रुपैयाँ सञ्चालन नाफा कमाएको थियो ।

असोज मसान्तसम्म आइपुग्दा एनआइसी एसिया लघुवित्तको प्रतिसेयर आम्दानी १८ रुपैयाँ ७६ पैसाले बढेर ३६ रुपैयाँ ३१ पैसा पुगेको छ । अघिल्लो वर्षको यसैअवधिमा यसको प्रतिसेयर आम्दानी १७ रुपैयाँ ५५ पैसा थियो । प्रतिसेयर नेटवर्थ १५७ रुपैयाँ ४१ पैसा छ ।

साधना लघुवित

साधना लघुवितले चालु आर्थिक वर्षको पहिलो त्रैमाससम्म ३ करोड २९ लाख ८ हजार रुपैयाँ मुनाफा आर्जन गरेको छ। यो गत आर्थिक वर्षको सोही अवधिको तुलनामा ८८.३९ प्रतिशत बढी हो। गत आर्थिक वर्षको सोही अवधिसम्ममा लघुवित्तले १ करोड ७४ लाख रुपैयाँ मुनाफा आर्जन गरेको थियो।

लघुवित्तको खुद ब्याज आम्दानी र सञ्चालन मुनाफा बढेसँगै खुद नाफा बढ्न पुगेको हो। समीक्षा अवधिमा लघुवित्तको खुद ब्याज आम्दानी १३०.७२ प्रतिशत बढेको छ भने सञ्चालन मुनाफा ५८९.२७ प्रतिशत बढेको छ। सम्भावित जोखिम बापतको व्यवस्थामा कम रकम छुट्याएका कारण खुद ब्याज आम्दानीको तुलनामा सञ्चालन मुनाफाको वृद्धिदर धेरै देखिएको हो।

समीक्षा अवधिमा लघुवित्तको चुक्ता पूँजी १८ प्रतिशत बढेको छ भने जगेडा कोष १०६.८९ प्रतिशत बढेको छ। त्यसैगरी, लघुवित्तको सापटी ४८.५८ प्रतिशत र निक्षेप ७१.३३ प्रतिशत बढेको छ भने कर्जा ६९.९५ प्रतिशत बढेको छ।

नाफासँगै लघुवित्तको प्रतिशेयर आम्दानी पनि बढेको छ। समीक्षा अवधिमा लघुवित्तको प्रतिशेयर आम्दानी ३२ रुपैयाँ ८ पैसाबाट १९ रुपैयाँ १४ पैसा बढेर ५१ रुपैयाँ २२ पैसा पुगेको छ। असोज मसान्तसम्ममा लघुवित्तको मूल्य आम्दानी अनुपात ३५.८५ गुणा रहेको छ भने प्रतिशेयर नेटवर्थ १६३ रुपैयाँ १० पैसा रहेको छ।

डिप्रोक्स लघुवित्त

डिप्रोक्स लघुवित्तले पहिलो त्रैमाससम्म १७ करोड ३५ लाख ८७ हजार रुपैयाँ मुनाफा आर्जन गरेको छ। यो गत आर्थिक वर्षको सोही अवधिको तुलनामा १२.३७ प्रतिशत कम हो। गत आर्थिक वर्षको सोही अवधिसम्ममा लघुवित्तले १९ करोड ८० लाख रुपैयाँ मुनाफा आर्जन गरेको थियो।

समीक्षा अवधिमा लघुवित्तको ब्याज आम्दानी १.२० प्रतिशत घटेको छ भने ११ करोड ९ लाख ऋणात्मकबाट २३ करोड २ लाख धनात्मक भएको छ। सम्भावित जोखिम बापतको व्यवस्थामा कम रकम छुट्याएका कारण लघुवित्तको सञ्चालन मुनाफा धनात्मक बन्न पुगेको हो।

समीक्षा अवधिमा लघुवित्तको चुक्ता पूँजी ३८ प्रतिशत बढेको छ भने जगेडा कोष ११.८० प्रतिशत बढेको छ। त्यसैगरी, लघुवित्तको सापटी २४.१७ प्रतिशत र निक्षेप ३१.३७ प्रतिशत बढेको छ भने कर्जा २७.८६ प्रतिशत बढेको छ।

मुनाफासँगै लघुवित्तको प्रतिशेयर आम्दानी पनि घटेको छ। समीक्षा अवधिमा लघुवित्तको प्रतिशेयर आम्दानी ७८ रुपैयाँ ८१ पैसाबाट २८ रुपैयाँ ७७ पैसा घटेर ५० रुपैयाँ ४ पैसामा झरेको छ। असोज मसान्तसम्ममा, लघुवित्तको मूल्य आम्दानी अनुपात २५.७२ गुणा रहेको छ भने प्रतिशेयर नेटवर्थ १८७ रुपैयाँ ३२ पैसा रहेको छ।