दुई कम्पनीको आईपीओ नेप्सेमा सूचीकृत, कहिले हुन्छ कारोबार ?

११ कार्तिक, काठमाडौं । बिहीबार दुई कम्पनीको आईपीओ नेप्सेमा सूचीकृत भएको छ । यस दिन साहस उर्जा कम्पनी र तेह्रथुम पावर कम्पनीको आईपीओ नेप्सेमा सूचीकृत भएको हो ।

साहस उर्जाको ३ करोड ५० लाख कित्ता र तेह्रथुम पावर कम्पनीको ४० लाख आईपीओ नेप्सेमा सूचीकृत भएको हो । नेप्सेमा सूचीकृत भएसँगै ती दुबै कम्पनीको शेयर आइतवारदेखि दोस्रो बजारमा कारोबारमा आउनेछ ।

नेप्सेले तेह्रथुम पावर कम्पनीको आईपीओलाई पहिलो कारोबारको लागि ८४ दशमलव ७४ देखि २५४ दशमलव २२ सम्म मूल्य रेञ्ज तोकेको छ ।

त्यसैगरी साहस उर्जाको आईपीओलाई नेप्सेले पहिलो कारोबारको लागि १३५ दशमलव ११ देखि ४०५ दशमलव ३३ मूल्य रेञ्ज तोकेको छ । नेप्सेले पहिलो कारोबारको लागि कम्पनीको नेटवर्थको तीन गुणासम्म मूल्य रेञ्ज तोक्ने गर्दछ ।

ती दुबै कम्पनी र नेप्सेबीच धितोपत्र सूचिकरण सम्झौता सम्पन्न भएसँगै आइतवारदेखि ती कम्पनीको दोस्रो बजारमा पहिलो कारोबार हुनेछ ।
साहस उर्जाको स्टक सिम्बोल एसएचएएस र तेह्रथुम पावरको टिपिसी रहेको छ ।