संसद अधिवेशन अन्त्य गर्न मन्त्रिपरिषद बैठककाे सिफारिस

११ कार्तिक, काठमाडौं । सरकारले संसद अधिवेशन अन्त्यको सिफारिस गरेको छ । आज बिहीबार बसेको मन्त्रिपरिषद बैठकले आजै रातिदेखि अधिवेशन अन्त्य गर्न सिफारिस गरेको हो।

२३ भदौमा शुरु भएको अधिवेशनमा प्रमुख विपक्षी नेकपा एमालेले लगातार नाराबाजी गर्दै आएको छ । एमालेको अवरोधका बीच सरकारले नयाँ बजेट ल्याएपनि अरु विधेयक अघि बढाएन । मन्त्रिपरिषदकाे सिफारिसमा राष्ट्रपतिले संसद अधिवेशन बोलाउने र अन्त्य गर्ने संवैधानिक व्यवस्था छ।

गत भदौ २३ गते सुरू भएको अधिवेशन नेकपा एमालेको अवरोधका कारण राम्रोसँग चल्न सकेको थिएन। यद्यपि, एमालेको अवरोधकै बीच सभामुखले बैठक सञ्चालन गरेका थिए। एमाले सांसदहरुको नाराबाजीकै बीच बजेट पनि पारित भएको थियो। प्रतिनिधिसभाको बैठक आज पनि बसेको थियो र अर्को बैठक कात्तिक २९ गतेका लागि बोलाइएको थियो।