एमाले महाधिवेशनः दलाल पुँजीवादमा उभिएर समाजवादको हुँकार

आफ्नै कारणले सत्ताबाट झरेर प्रतिपक्षमा पुगेको नेकपा एमालेले दसौं महाधिवेशन भव्यताका साथ चितवनमा गर्दै छ । एमालेको यो अधिवेशनले अध्यक्षसहित अन्य पदाधिकारीको चयन गर्नेछ । नेकपा बनाउने र भत्काउने दुवै खेलमा अग्रणी भूमिका खेलेका केपी ओली यो अधिवेशनका केन्द्रविन्दुमा छन् । आगामी कार्यकालका लागि उनी अध्यक्ष पदमा दोहोरिने छन् । तलदेखि नै सर्वसम्मतिमा प्रतिनिधिहरु छानिएर आएकाले यो महाधिवेशन ओलीको घेराभन्दा पर जाने छैन । उनको घेरमा पर्ने नेताहरु गदगद छन् भने त्यसमा नपर्नेहरु बिलखबन्दमा छन् ।

केपी शर्मा ओलीले एमालेलाई पहिलेको भन्दा सशक्त बनाउने र अपार जनमत बटुलेर आगामी तीनै तहका निर्वाचन जितेर सिंहदरबार छिर्ने घोषणा गरेका छन् । अन्य पार्टीहरु तथा जनतालाई त्यसैको झल्को देखाए जस्तै गरी कार्यकर्ताको ठूलो भीड नारायणी किनारमा उतारे । एमालेको महाधिवेशनमा केपी ओलीको घेरा बाहिरका कसैले पनि केन्द्रीय सदस्यमा प्रवेश पाउने छैनन् । महाधिवेशनपछि एमाले हिँड्ने मात्रै होइन छलांग मार्ने सचिव योगेश भट्टराईले पत्रकारसामू बिहीबार बताए । उनले एमाले जनताको बहुदलीय जनवाद अँगाल्दै समाजवादमा कुद्ने पनि बताए । केपी ओलीले एमालेले बहुमतका साथ चुनाव जित्ने र देशलाई समाजवादमा लैजाने त पहिलेदेखि नै बताउँदै आएकै हुन् ।

एमालेको महाधिवेशनको तामझाम, उसको खर्च, नेताहरुको अवस्था र आमकार्यकर्ताको अवस्थालाई हेर्दा दलाल पुँजीवादको जगमा समाजवादको हुँकार हुने स्पष्ट हुन्छ । एमालेको महाधिवेशनको खर्च ६ देखि ७ करोड रुपैयाँ आउने बताइएको छ । तामझामलाई हेर्दा अझ बढी पनि आउन सक्छ भन्ने अनुमान गर्न सकिन्छ । यो पैसा कहाँबाट आउला ? एमालेले जनाएअनुसार केही लाख रुपैयाँ अनलाइन आह्वानबाट कार्यकर्ता तथा शुभचिन्तकबाट उठाइयो ।

केही हिस्सा सदस्यता शुल्क कार्यकर्ता तथा नेताबाट उठ्ला तर महाधिवेशनको अधिकांश खर्च त पुँजीपतिबाटै उठाउने हो नि । अधिकांश पार्टीलाई सहयोग गर्ने पुँजीपति दलाल नै भएको पाइएको छ । सहयोग गरेबापत ठूलो ठेक्का हात पार्ने, विशेष योजना हात पार्ने, कमिसन लिएर विदेशी योजना भित्राउनेहरु नै हुन् । केपी शर्मा ओलीको सरकार हुँदा औषधिमा ठूलो रकम कमिसन खाने, कौडीको भाउमा मत्वपूर्ण सरकारी जग्गा भाडामा लिने, जग्गा दलाली गरेर ठूलो रकम कमाउने अति सल्बलाएको त कसैबाट छिपेन । मेडिकल व्यवसायीको गिरोहदेखि शिक्षा व्यवसायीसम्मले समाजवाद शब्दलाई धोती लगाइदिएकै हुन् ।

एमाले महाधिवेशनका लागि खर्च जुटाइदिने यिनै समूह त हुन् । यो जग दलाल पुँजीवादको होइन भनेर कुन ,विश्लेषकले भन्ला ? जनताले त भोगिरहेकै छन् । शिक्षा, स्वास्थ्यमा चरम अराजकता हुनु, सर्वसाधारणको पहुँचबाट बाहिर जानु समाजवादको सुरुवात होइन, व्यंग्य हो । एमालेले पहिले सकेन किनकि माधव नेपालहरु थिए, अब उनीहरुलाई पाखा लगाइयो तसर्थ अब समाजवाद निश्चित छ भनेको हुनुपर्छ । नेताहरुको बोली सुन्दा त्यस्तै लाग्छ । कही क्षणलाई त्यसैलाई मानेर अरु नेताको कार्यकुशलता, बौद्धिक क्षमतालाई हेरौं । माओवादीबाट ओली समूहमा आएका बादलदेखि टोपबहादुर रायमाझी, लेखराज भट्ट, प्रभु साहले समाजवादको बाटो तय गर्लान् ? ओलीलाई बलियो त अवश्य बनाउलान् तर समाजवाद उनीहरुको काम र सोचबाहिरको कुरा हो । १० बुँदे सहमतिबाट ओली पक्षमा आएका नेताको हैसियत समाजादमा जाने स्तरको कहिल्यै छैन, अब कसरी होला र ? घनश्याम भुसालको सिद्धान्तले पनि दलाल पुँजीवादलाई चिर्न सक्ने छैन । उनकै राजनीतिक अस्तित्व रहने हो कि होइन ? अनिश्चित छ ।

अहिलेको महाधिवेशनका केन्द्रमा रहेका केपी ओलीको घेरामा रहेका ईश्वर, शंकर पोखरेलहरु, पृथ्वी गुरुंग, शेरधन, अष्टलक्ष्मीजस्ता नेततहरुको गन्तव्य दलाल पुँजीवाद नै हो समाजवादमा जाने सोच र कार्यव्यवहारले कहिल्यै भ्याएन न अब झन् भ्याउने कुरै छैन । यीबाहेक कम्युनिष्ट बौद्धिक कुनचाहिँ होला र दलला पुँजीवादको जालो चिरेर समाजवादको सोच राख्ने ?

कार्यदिशा बनाउने र देशलाई समाजवादमा डोर्याउने ? पर्दापछाडिबाट फुत्त निस्कने त होइन होला ? दस्तावेजमा लेख्न त अहिले दुःख छैन जे पनि गुगलमा खोजे पाइन्छ । तसर्थ अहिलेको एमालेको महाधिवेशनले बाटो कोर्ने भनेको दलाल पुँजीवाद नै हो । महाधिवेशनमा आएका आम कार्यकता सडमा खाना बनाएर खाँदै छन्, नेताहरु होटलको अटाली रमाउँदै गरेका दृश्य रोचक लाग्दा छन् होइन र ?