प्रधानमन्त्रीसँग ‘रअ’ का नेपाल प्रमुखको भेटघाट, कांग्रेस सभापतिमा कसैलाई पनि समर्थन नरहेको जानकारी

१८ मंसिर, काठमाडौं । नेपाली कांग्रेसको महाधिवेशन नजिकिदै गर्दा भारतीय गुप्तचर संस्था ‘रअ’ ले चासो देखाएको छ । भारतीय मोदी सरकार र भारतीय गुप्तचर संस्था ‘रअ’ ले चासो देखाएको हो ।

कांग्रेसभित्र सभापति पदका विमलेन्द्र निधिले उम्मेदवार घोषणा गरेको र कोइराला परिवार तथा रामचन्द्र पौडेल समूहले अहिलेसम्म कुनै पनि उम्मेदवार घोषणा नगरेको अवस्थामा ‘रअ’ का अधिकारीहरुले बिहीबार साँझ प्रधानमन्त्री शेरबहादुर देउवासँग भेटघाट गरेका हुन् ।

नेपाली सुरक्षा अधिकारीका अनुसार प्रधानमन्त्री देउवाको सरकारी निवास बालुवाटारमा बिहीबार साँझ भारतीय गुप्तचर संस्था ‘रअ’ का नेपालस्थित प्रमुखले भेटघाट गरेका थिए । सो भेटघाटमा रअका प्रमुख राघव भट्नागरले नेपाली कांग्रेसको भावी नेतृत्वका बारेमा प्रधानमन्त्री देउवासँग चासो राखेको र त्यसबारेमा भारतीय सरकारको धारणासमेत जानकारी गराएको स्रोतको दाबी छ ।

सुरक्षा स्रोतका अनुसार, भारतीय गुप्तचर संस्था ‘रअ’ का नेपालस्थित प्रमुख भट्नागर आफ्ना सहयोगीसहित पुगेका थिए । भारतको हिन्दूवादी तथा संस्थापन पक्षले नेपाली कांग्रेसको आगामी महाधिवेशनमा प्रधानमन्त्री शेरवहादुर देउवालाई असहयोग गर्ने र सभापतिका अन्य आकांक्षीहरुलाई सघाउने हल्ला नेपाली कांग्रेसभित्र फैलिएपछि रअका नेपाल प्रमुख भट्नागर प्रधानमन्त्री देउवालाई भेट्न पुगेका थिए ।

भारतीय प्रधानमन्त्री नरेन्द्र मोदीको नेपाल नीति परिचालन गर्ने जिम्मेवारी पाएका राष्ट्रिय सुरक्षा सल्लाहकार अजित डोभालको सन्देशसहित भट्नागरले देउवालाई भेटेको स्रोतको दाबी छ । ‘नेपालको राजनीतिक अवस्था, आसन्न महाधिवेशन र राजनीतिक दलहरुबीच देखिएको असमझदारीको विषयमा उहाँहरुबीच कुराकानी भएको थियो’, स्रोतले भन्यो ।

डोभालले भारत सरकार र भारतको गुप्तचर एजेन्सी रअले नेपाली कांग्रेसको आगामी अधिवेशनमा कसैलाई पनि जिताउन वा हराउन नलाग्ने र जित-हारका लागि कोही पनि परिचालन नगरिएको स्पष्ट पार्ने प्रयास गरेको स्रोतको दाबी छ । प्रधानमन्त्री देउवासँग भट्नागरले ४५ मिनेट भेट गरेका थिए । त्यो समयमा उनले भारतीय संस्थापन पक्षको धारणा र कांग्रेसभित्र देखिएको समस्याको बारेमा भारतीय पक्षको चासो नरहेको पनि धारणा राखेका थिए ।

‘भारतीय प्रधानमन्त्री नरेन्द्र मोदीको नेपाल नीति परिचालन गर्ने जिम्मेवारी पाएका राष्ट्रिय सुरक्षा सल्लाहकार अजित डोभालको सन्देशसहित भट्नागरले देउवालाई भेटेका हुन्’, उच्च स्रोतले भन्यो । डोभालले भारत सरकार र भारतको गुप्तचर एजेन्सी रअले नेपाली कांग्रेसको आगामी अधिवेशनमा कसैलाई पनि जिताउन वा हराउन नलाग्ने र जित र हारका लागि कोही पनि परिचालन नगरिएको स्पष्ट पार्ने प्रयाससहित भट्नागरलाई भेट्न पठाएका थिए । भट्नागरलाई भारतीय दूतावासले नै समय मिलाइदिएको पनि स्रोतले जनाएको छ ।