हिमाली भेगका बालबालिकालाई मोडेर्ना खोप लगाउने तयारी

२१ मंसिर, काठमाडौं । सरकारले हिमाली भेगका १२–१७ वर्ष उमेर समूहका बालबालिकालाई कोभिड–१९ विरुद्धको मोडेर्ना खोप लगाउने भएको छ ।

कोभ्याक्स सुविधामार्फत एक लाख ८८ हजार डोज मोडेर्ना खोप नेपाल भित्रिएने भएपछि सरकारले पहिलो चरणमा हिमाली जिल्लाका बालबालिकालाई प्राथमिकतामा राखेर खोप लगाउने तयारी गरेको हो ।

आगामी हप्तादेखि बालबालिकालाई मोडेर्ना खोप लगाउने तयारी गरिएको स्वास्थ्य सेवा विभागले जनाएको छ । हिमाली जिल्ला भएका कारण अहिलेको अवस्थामा बालबालिकालाई अहिले खोप लगाउन सकिने वा नसकिले अवस्था हेरेर निर्णय गरिने छ । तत्काल १० लाख डोज मोडेर्ना खोप आउने र जनवरी महिनाभित्र थप ४० लाख डोज माडर्ना खोप नेपाल भित्रिदैँ छ । खोप आएसँगै अन्य जिल्लामा पनि बालबालिकालाई खोप अभियान सञ्चालन हुने विभागले जनाएको छ ।