शशांकले भने:- रामचन्द्र पौडेलका लागि दाबी छोड्न तयार छु

२१ मंसिर, काठमाडौं । नेपाली कांग्रेसका महामन्त्री डा. शशांक कोइरालाले १४ औं महाधिवेशनमा सभापति पदमा दावी छाड्ने भएका छन् । मंगलबार नेता प्रकाशमान सिंहको निवास चाक्सीबारीमा बसेको बैठकमा कोइरालाले रामचन्द्र पौडेल, प्रकाशमान सिंह र शेखर कोइरालाबीच सहमति भए आफू सभापतिमा दावी छाड्न तयार भएको बताए ।

बैठकमा उनले सबभन्दा पपुलर आफू भएको दाबी गरेका थिए । तर साझा उम्मेदवार दिन नसक्ने हो भने हार्ने भएकाले सभापतिमा दाबी छाड्न आफू तयार रहेको उनले बताए ।

महामन्त्री कोइरालाले सञ्चारकर्मीहरुलाई आफुले सभापतिको दावी तीन जनाको जिम्मामा छोडेको बताए । अब तीन जनामा मिलेर अगाडी आउन उनको सुझाव थियो ।

अब साझा उम्मेदवार दिने सम्भावना बढेको उनले बताए । कतिपयले भोटिङ गरेर उम्मेदवार छान्न सुझाव दिएको भए पनि त्यो उपयुक्त नभएको उनले बताए ।