फर्स्ट माइक्रोफाइनान्सको मुनाफा ३८.११ प्रतिशतले बढ्यो, ईपीएस कति ?

५ माघ, काठमाडौं । फर्स्ट माइक्रोफाइनान्स लघुवित्त वित्तीय संस्था लिमिटेडले चालु आर्थिक वर्षको दोस्रो त्रैमाससम्ममाको अपरिष्कृत वित्तीय विवरण सार्वजनिक गरेको छ। विवरण अनुसार लघुवित्तको मुनाफा उल्लेख्य बढेको छ ।

चालु आर्थिक वर्षको दोस्रो त्रैमाससम्ममा लघुवित्तले १० करोड ४४ लाख रुपैयाँ मुनाफा आर्जन गरेको छ। अधिल्लो बर्ष सोही अवधिमा लघुवित्तले ७ करोड ५६ लाख रुपैयाँ मुनाफा गरेको थियो।

खुद ब्याज आम्दानी र सञ्चालन मुनाफा बढेसँगै लघुवित्तको खुद नाफा बढ्न पुगेको हो। दोस्रो त्रैमासमा लघुवित्तको ब्याज आम्दानी ५०.०४ प्रतिशतले बढेर १८ करोड २३ लाख रुपैयाँ पुगेको छ ।

त्यस्तै, सञ्चालन मुनाफा ४५.११ प्रतिशतले बढेर १४ करोड ८८ लाख रुपैयाँ पुगेको छ। लघुवित्तको वितरणयोग्य मुनाफा ६ करोड ९६ लाख रुपैयाँ रहेको छ।

साथै, लघुवित्तको ईपीएस २१ रुपैयाँ ६६ पैसा पुगेको छ भने प्रतिशेयर नेटर्वथ १२७ दशमलव ३७ रुपैयाँ पुगेको छ ।