अग्रवाल परिवार फरार प्रकरणः शहरमा मिटरव्याजीको जगजगी

७ माघ, काठमाडौं । मंहगा मदिरा आयात गरी बिक्री गर्ने रिटेल शप ‘ग्रीनलाइन’को बन्द र त्यसका सञ्चालकहरु फरार भएपछि शहरमा मिटरव्याजीहरुको जगजगीबारे प्रहरी अचम्मित भएको छ । प्रहरी कार्यालयमा दर्जनभन्दा बढी व्यक्तिहरु आफ्नो पैसा डुबेको भन्दै अग्रवाल परिवारको खोजी गरिदिनु पर्यो भन्दै पुगेपछि प्रहरी अचम्मित भएका हुन् ।

बैंक तथा वित्तिय संस्था मात्र होइन व्यक्तिगत ऋण समेत लिएका अग्रवाल परिवारले ऋण तिर्न नसकेकै कारण भागेको हुनसक्ने आँकलन गरिएको छ । ‘उनीहरुसँग पैसा डुबेको भन्दै आउनेहरु मिटरव्याजी भएको आंशका हामीलाई छ उनीहरुको बारेमा पनि प्रहरीले अनुसन्धान गर्नेछ’, महानगरीय प्रहरी परिसर काठमाडौंका एक प्रहरीले नेपालबहस डटकमसँग कुराकानीमा भने । उनका अनुसार दैनिक जसो एक जना गर्दै अग्रवाल परिवारको बारेमा जानकारी लिन प्रहरी कार्यालय पुग्ने गरेका छन् ।

हाल ग्रीनलाइनका सञ्चालक अमित र अभिषेक अग्रवाल सम्पर्कमा छैनन । बाबु ओमप्रकाश अग्रवालसहित सबै परिवार अहिले सम्पर्क बाहिर भएपछि प्रहरीले उनीहरुको खोजी गरेको छ । दुई दाजुभाई र उनीहरुको खोजीमा अहिले प्रहरी प्रशासनसमेत लागेको भएपनि उनीहरु कहाँ छन भन्ने बारेमा प्रहरीले जानकारी पाएको छैन । जानकारहरुका अनुसार करोडौंको कारोबार गर्ने रेपुटेड कम्पनी छाडेर अग्रवाल परिवार भाग्नुका पछाडि आर्थिक संकट नै हो ।

बुबा ओमप्रकाशले मेहनत गरेर तयार पारेको व्यापारिक साम्राज्य दुई दाजुभाईको महत्वाकांक्षाले उनीहरुलाई डुबाइएको बताइएको छ । रिटेल शपमा अहिले एभरेष्ट बैंक र नेपाल इन्भेष्टमेन्ट बैंकले सूचना टाँस्दै ‘सबै स्टक आफ्नो स्वामित्वमा रहेको’ भन्दै सिलबन्दी गरेका छन् । मेगा बैकले कुलेश्वरमा रहेको जग्गालाई लिलामीमा राखेको छ । अहिले ग्रीनलाइनका सञ्चालक अमित र अभिषेक अग्रवाल सम्पर्कमा छैनन् । बाबु ओमप्रकाश अग्रवालसहित सबै परिवार अहिले सम्पर्क बाहिर रहेका बेला उनका छोरी ज्वाईले प्रहरीमा खोजवीनका लागि उजुरी दिएका छन् ।

दुई दाजुभाईको खोजीमा अहिले प्रहरी प्रशासनसमेत लागेको छ । जानकारहरुका अनुसार करोडौंको कारोबार गर्ने कम्पनी छाडेर अग्रवाल परिवार भाग्नुका पछाडि आर्थिक संकट नै रहेको बुझिएको छ । महेश बस्नेत उद्योगमन्त्री भएपछि मन्त्री बस्नेतको अध्यक्षतामा २०७२ असोज १ गते बसेको औद्योगिक प्रवर्द्धन बोर्डको २१६ औं बैठकले मदिरा उद्योगको इजाजत खुला गर्ने निर्णय गरेपछि उनीहरुले विदेशी मदिराको कारोवार थालेका थिए । मदिरा व्यवशाय गर्ने क्रममा उनीहरुले पाँच करोड रुपैयाँ लिएका थिए । तर त्यही रकम केही वर्षमै १८ करोड पुगेपछि उनीहरुको ओरोलो यात्रा शुरु भएको अनुमान छ ।

व्यापारिक क्षेत्रमा उनलाई चिन्नेहरुले मिटर ब्याजकै रकम मात्रै ५० करोड रुपैयाँभन्दा माथि पुगेपछि भार थेग्न सकेनन् । मिटरव्याजकै पैसा तिर्न नसक्दा ज्यान मार्ने, परिवारका सदस्य अपहरण गर्नेसम्मको धम्की आएपछि उनीहरुले बिना धितो तीन÷चार वटा सहकारीबाट पनि उनीहरुले ऋण चलाएका थिए । कोभिडकै कारण होटल र रेष्टुरेन्ट पनि बन्द भएपछि होटल र रेष्टुरेन्टमा मदिराको कारोबार ठप्पजस्तै भएकाले उनीहरु झन समस्या पर्दे गएकाले व्यापार छाड्नु परेर भागेको हुनसक्ने अनुमान गरिएको छ ।

स्रोतका अनुसार क्यासिनो, तारे होटल, रेष्टुरेन्ट र राम्रा पार्टी प्यालेसमा झण्डै २० करोड रुपैयाँ उधारो बाँकी रहेको छ । यतिबेला उनीहरु भागेपछि तिनीहरुलाई हाइसन्चो भएको भएको छ । स्रोतहरुका अनुसार, अग्रवाल दाजुभाइ आर्थिक रुपमा टाठ पल्टिएपछि उनीहरुले आफ्नो विभिन्न ठाउँमा रहेको घरजग्गा (जुन बैंकमा धितोमा थियो) देखाउँदै पैसा उठाउन थालेको पनि स्रोतको दावी छ ।

उनीहरु कहाँ भागे ?

महानगरीय प्रहरी परिसर काठमाडौंले उनीहरुको खोजी कार्य शुरु गरेको छ । प्रहरीका अनुसार उनीहरुले प्रयोग गर्दै आएको गाडी पनि लिएर भागेका छन् । अग्रवाल परिवारका ९ जना सदस्य ओमप्रकाश, अमित, अभिषेक, भारती अग्रवाल उषा अग्रवाल, रुचिका अग्रवाल, १७ वर्षीय नातिनी नन्दनी अग्रवाल, ९ वर्षीय पार्था अग्रवाल र २ वर्षीय अनव अग्रवाल छोरी ज्वाई र आफन्तहरुको सम्पर्क बाहिर छन् । प्रहरीले उनीहरुले चलाएको मोवाइल ट्रयास गर्दा पनि घरमै स्वीच अफ गरेका कारण कहाँ पुगे भन्ने बारेमा केही बताउन सकेको छैन ।

‘उनीहरुको खोजी गरिहेका छौ केही सम्पर्क छैन सूत्रहरुमार्फत खोजी कार्य जारी छ’, परिसर प्रहरी प्रवक्ता एसपी दिनेश मैनालीले भने । प्रहरीले उनीहरूले प्रयोग गर्ने मोबाइलमा पनि सम्पर्क गरेको थियो। मोबाइलको कल ट्रेसिङ गर्दा पनि उनीहरू कहाँ गएको भन्ने खुल्न सकेको छैन । पछिल्लो पटक उनीहरु जान सक्ने स्थानको बारेमा प्रहरीले निगरानी गरेको छ । यद्यपि नेपाल भारत सीमा क्षेत्रमा उनीहरुको कल ट्रेसिङ देखिएको छैन । प्रहरीले उनीहरुको घर पुगेर सोधखोज गर्ने क्रममा एउटा कागज समेत फेला पारेका थियो । त्यसमा आफ्नो सम्पत्ति सबैले बाँडेर लिनु भन्ने उल्लेख भएको प्रहरीले जनाएको छ ।