एभरेष्ट बैंकको निक्षेप संकलन १६५ अर्ब माथि, मुनाफा घट्यो

७ माघ, काठमाडौं । एभरेष्ट बैंकले आर्थिक वर्ष २०७८/७९ को दोश्रो त्रैमासको वित्तिय विवरण प्रकाशित गरेको छ। विवरण अनुसार कम्पनीले यस त्रैमास सम्ममा ८३ करोड ८९ लाख रुपैयाँ मुनाफा आर्जन गरेको छ। मुनाफा अघिल्लो आर्थिक वर्षको दोश्रो त्रैमासको तुलनामा १२.७९ प्रतिशतले कम हो ।

एभरेष्ट बैंकले चालु आर्थिक वर्षको दोस्रो त्रैमासमा सामान्य मुनाफा घटेको छ। गत आर्थिक वर्षको दोस्रो त्रैमासमा ९६ करोड १९ लाख रुपैयाँ मुनाफा गरेको बैंकले चालु आर्थिक वर्षको सोहि अवधिमा ८३ करोड ८९ लाख रुपैयाँ मुनाफा गरेको छ । बैंकको वितरण योग्य नाफा भने २ अर्ब रुपैयाँभन्दा धेरै छ।

बैंकको खुद ब्याज आम्दानी भने १२ प्रतिशतले बढेको छ। ब्याज आम्दानी बढेपनि सञ्चालन आम्दानी घट्दा बैंकको नाफामा असर परेको हो।

९ अर्ब ४६ करोड रुपैयाँ चुक्ता पूँजी रहेको बैंकको जगेडा कोषमा ८ अर्ब ३० करोड रुपैयाँ छ। बैंकको निक्षेप संकलन ३ प्रतिशतले बढेर १ खर्ब ६५ अर्ब रुपैयाँ पुगेको छ भने कर्जा लगानी १ खर्ब ४२ अर्ब रुपैयाँ पुगेको छ। बैंकको प्रतिशेयर आम्दानी घटेर १७ रुपैयाँ ७२ पैसामा झरेको छ भने प्रतिशेयर नेटवर्थ २२१ रुपैयाँ ११ पैसा छ।