एमाले अध्यक्ष ओलीले आइतबार पत्रकार सम्मेलन गर्ने

८ माघ, काठमाडौं । सरकारले स्थानीय तहको निर्वाचन गर्न आलटाल गरेको भन्दै नेकपा एमालेका अध्यक्ष केपी ओलीले आइतबार पत्रकार सम्मेलन गरेर पार्टीको धारणा सार्वजनिक गर्ने भएका छन् ।

सरकारको तर्फबाट ६ महिने उपलब्धी सार्वजनिक गरेको तेस्रो दिन पार्टी अध्यक्ष ओलीले पत्रकार सम्मेलन गरेर एमालेको धारणा सार्वजनिक गर्न लागेका हुन् । पत्रकार सम्मेलनमा सरकारले घोषणा गर्न आलटाल गरिरहेको स्थानीय तहको निर्वाचन र प्रधनमन्त्रीले सम्बोधनमा आफ्नो सरकारले गरेका विकास निर्माणका कामहरुको वास्तविकता र समग्र राजनीतिक परिस्थितीका बारेमा एमालेको धारणा सावर्जनिक गर्ने तयारी रहेको एमालेले जनाएको छ ।

पार्टीका उपमहासचिव विष्णु रिमालका अनुसार आइतबार पत्रकार सम्मेलन गर्ने तयारी छ । पत्रकार सम्मेलन भर्चुअल गर्ने कि भौतिक उपस्थितीमा गर्ने यकिन भइनसकेको रिमालले जानकारी दिएका छन् । पत्रकार सम्मेलनको स्थान र समय तय हुन बाँकी रहेको अध्यक्षको सचिवालयले जनाएको छ । ‘पत्रकार सम्मेलन गरेर सरकारले सार्वजनिक गरेको विषयहरुको बारेमा पनि पार्टी अध्यक्षले बोल्नु हुनेछ’, रिमालले भने ।

एमालेका महासचिव शंकर पोखरेल र सचिव योगेश भट्टराइले सामाजिक सञ्जालमा आफ्ना राखिरहेक बेला ओलीले पत्रकार सम्मेलनको तयारी गरेका छन् । एमाले अध्यक्ष आफैले सरकारले गरेका काम र अहिलेको बढ्दो संक्रमणबारे एमालेको धारणा राख्न लागेका हुन् ।