सशस्त्र एसपीको निगरानीमा सर्लाहीका सबै सीमा नाका तस्करीका लागि खुला

९ माघ, मलंगवा । सर्लाहीमा सशस्त्र प्रहरीको मिलेमतोमा तस्करीलाई बढवा दिन थालिएको छ । नेपाल–भारत सीमा क्षेत्रलाई दैनिक चार घण्टा चेकजाँच बिनानै खुला गरेर तस्करीलाई बढवा दिन थालिएकाे हाे । ‘राती, बिहान, दिउँसो र साँझगरी मिलाएर चार घण्टा खुला राख्ने गरिएको छ, सीमा पोष्टमा रहेको सशस्त्र र सीमा सुरक्षा चौकीको नाममा रहेको नेपाल प्रहरी दुवैले आँखा चिम्लिने गरेका छन्’, नेपाल प्रहरीका एक अधिकारीले सर्लाहीबाट भने ।

उनका अनुसार सबै सीमा क्षेत्रमा नेपाल प्रहरीलाई मिलाउने जिम्मा सशस्त्र प्रहरीका एसपी भरत खनियाँले मिलाएका छन् । ‘सशस्त्रका एसपी खनियाँ हप्तामा एकपटक सीमा निरीक्षणको नाममा सीमा क्षेत्रमा गएर कार्यालय फर्कने गरेका छन्’, ती प्रहरीको भनाई छ ।

उनका अनुसार सर्लाहीको पर्सा गाउँपालिका–३ स्थित नारायणपुरमा नेपाली र भारतीय नागरिकको बरोबर हिडडुल गर्न दिइएको छ । सीमा क्षेत्रमा सैयौं बिघा नेपाली जमीनको मालिक भारतीयहरु रहेका छन् । त्यहाँ नेपाली भूमिमा बाँस र आप रोपेको कारण उनीहरुको आउजाउ बढेको मात्रै होइन तस्करीमा पनि उनीहरुको संलग्नता रहेको छ । तर नजिकै रहेको सशस्त्र प्रहरी र नेपाल प्रहरी दुवै मौन रहेको छ ।

त्यसैगरी उखु खेतीबाट पलायन गराउने चिनी उद्योगीहरुले भारतबाट उखु तस्करी गरी नेपाल ल्याउन पनि प्रहरीको सहयोग रहेको छ । ‘सर्लाही प्रहरी प्रशासनको मिलोमतोमा भारतबाट दैनिक हजारौँ क्वीन्टल उखु नेपालतर्फ तस्करी भइरहेको छ, सीमामा रहेको प्रहरीले केही गर्देन उल्टै पैसा लिएर छाडिदिन्छ’, स्रोतले भन्यो । स्रोतका अनुसार अवैध रुपमा भारतबाट उखु भित्र्याउनको लागि चिनी उद्योगीहरुले सीमा क्षेत्रमा नै दुई दर्जन जति उखु तौल गर्ने मेसिन काँटाको स्थापना गरेर बस्दा पनि जिल्ला प्रहरी कार्यालय र सशस्त्र प्रहरीले कुनै पनि कारवाही अघि बढाएका छैनन ।

भारतबाट अवैध रुपमा उखु तस्करी गराउन चिनी उद्योगहरुले सर्लाहीको बलरा तथा फेनहाराको दशगजा क्षेत्रमा करिब दुई दर्जन काँटा संचालनमा ल्याएको स्रोतको दावी छ । मलंगवाको गोरखकाली मुख्य नाकासहित अन्य ७ वटा छोटी नाकामा निर्वाध रुपमा तस्करी सञ्चालनमा आएको छ । ‘ छोटी नाकाहरु संग्रामपुर, पर्सा, त्रिभुवननगर, भाडसर, बाराउद्योरण, फेन्हारा र बलरा नाकाबाट उखु तस्करी भएको छ । त्यतिमात्र होइन नेपालबाट चुरे दोहोन गरेर लगिएको गिटी वालुवा पनि भारततर्फ निकासी हुने गरेको छ । ‘बर्दिवासबाटै च्यानल मिलाएर लगिएको हुन्छ, त्यहाँ प्रहरीले यसो हेर्ने दिए थापेर लिने नत्र माथिको आदेश अनुसार छाडिदिने गरेको छ’, स्रोतले भन्यो ।

सर्लाहीबाट तस्करी बढेको भन्दै नेपाल–भारत सीमा क्षेत्रस्थित सर्लाहीका तीन स्थानमा एक वर्ष अघि एकैदिन सशस्त्र प्रहरी बलको बोर्डर आउट पोष्ट (बीओपी) थप गरिएको थियो । सीमावर्ती क्षेत्रस्थित गोडैता नगरपालिका–३, बहादुरपुर, मलंगवा नगरपालिका–५, भाडसर र ब्रम्हपुरी गाउँपालिका–५, सखुअवामा बीओपी स्थापना गरिएको थियो । सर्लाहीको ५१ किलोमिटर सीमा क्षेत्रमा १७ वटा बोर्डर आउट पोष्ट निर्माण गर्ने क्रममा सर्लाहीको प्रत्येक बीओपीमा सशस्त्र प्रहरी निरीक्षक (इन्सपेक्टर) को नेतृत्वमा ३५ जनाको हाराहारीमा सशस्त्र प्रहरी राखिएको थियो ।

तर एसपी खनियाँ गएपछि ती बीओपीमा १५ जना पनि जनशक्ति नभएको र गस्तीमा दुई देखि तीन जना मात्रै जाने गरेका छन् । त्यसैगरी नेपाल प्रहरी समेत कहिलेकाही संयुक्त गस्ती बढाउँदा नेपाल प्रहरीलाई पनि सशस्त्र प्रहरीले नै तस्करीमा सहयोग पुर्याउन आग्रह गरिरहेको त्यसवापत नेपाल प्रहरीले पनि आर्थिक लाभ लिने गरेको स्रोतको दावी छ ।

तस्करीका लागि मन्ध्यान्ह १२ बजे, साँझ छ बजेपछि विहान ६ बजेको समय निर्धारण गरिएको स्रोतको दावी छ । भारतीय एसएसबीले डिउटी परिवर्तन गर्ने र नेपालमा पनि डिउटी परिवर्तन हुने समय मिलाएर तस्करीको समय मिलाइएको स्रोतले जनाएको छ । तीन वटा जिल्ला कमाण्ड गरिसकेका सशस्त्र एसपी खनियाँ गृह मन्त्रालयको पावर लगाएर चौथो कमाण्ड गर्न सर्लाही पुगेका थिए । उनी गएको छ महिनाभित्रै तस्करीका लागि सबै नाकाहरु खुला गरिएको स्रोतले जनाएको छ ।