ओलीलाई कोरोना भएपछि आजको पत्रकार सम्मेलन स्थगित

९ माघ, काठमाडौं । कोभिड संक्रमणको जोखिच उच्च हुँदै जाँदा एमाले अध्यक्ष केपी ओलीलाई पनि संक्रमण भएको छ । उनी संक्रमति भएपछि आइतबार हुने भनिएको पत्रकार सम्मेलन पनि रोकिएको छ ।

प्रधानमन्त्री शेरबहादुर देउवाको सम्बोधन तथा पछिल्लो राजनीतिक तथा आर्थिक संकटबारे पार्टीको दृष्टिकोण सार्वजनिक गर्न एमालेले पत्रकार सम्मेलन गर्न लागेको थियो । पत्रकार सम्मेलनमा अध्यक्ष केपी शर्मा ओलीलेसमग्र विषयमा पार्टीको धारणा राख्ने बताइएको थियो । तर, पछिल्लो समयमा देखिएको उच्च संक्रमणदर र स्वास्थ्य सुरक्षा मापदण्डलाई ध्यान दिँदै प्रेस वक्तव्यमार्फत अध्यक्ष ओलीले पार्टीको धारणा जनतामा लैजाने एमाले उपमहासचिव प्रदीप ज्ञावलीले बताएका छन् ।

सरकारले २५ जनाभन्दा बढी भेला हुन नपाउने गरी स्वास्थ्य सुरक्षा मापदण्ड लागू गरेकाले त्यसलाई समेत ध्यानमा राखेर पत्रकार सम्मेलन स्थगित गरिएको भनिएपनि अध्यक्ष ओलीलाई संक्रमण भएपछि पत्रकार सम्मेलन रोकिएको हो ।

केही दिनदेखि ओलीको स्वास्थ्यमा असहजता भएपछि गरिएको पीसीआर परीक्षणमा ओलीलाई संक्रमण पुष्टि भएको हो । उनी हाल बालकोटस्थित आफ्नै निवासमा स्वास्थ्यलाभ गरिरहेका छन् । कोरोना संक्रमण पुष्टि भएको बारे केही बेरमा पार्टीले वक्तब्य जारी गर्ने भएको छ । सचिवालय स्रोतका अनुसार ओलीलाई हल्का रुघा खोकी र जिउ सामान्य दुख्ने समस्या छ । डाक्टरको सल्लाहअनुसार आइसोलेसनमा बस्नुपर्ने भएकोले पूर्वनिर्धारित सम्पूर्ण कार्यक्रमहरू स्थगित गरिएको छ ।