हिमालयन जनरल इन्स्योरेन्सको मुनाफा १४ प्रतिशतले घट्यो ?

२८ माघ, काठमाडौं । हिमालयन जनरल इन्स्योरेन्स कम्पनीले चालू आवको दोस्रो त्रैमासिक वित्तीय विवरण सार्वजनिक गरेको छ ।

उक्त वित्तीय विवरण अनुसार कम्पनीको मुनाफा गत आवको दोस्रो त्रैमासको तुलनामा चालू आवको सोही अवधिमा १४ प्रतिशत घटेको छ ।

कम्पनीले गत आवको दोस्रो त्रैमाससम्ममा ६ करोड ११ लाख मुनाफा गरेकोमा चालू आवको सोही अवधिमा घटेर ५ करोड २२ लाखमा झरेको हो ।

चालू आवको दोस्रो त्रैमासमा कम्पनीको आम्दानी घटेकाले मुनाफा घट्न पुगेको हो । कम्पनीले गत आवको दोस्रो त्रैमाससम्ममा १० करोड ४८ लाख आम्दानी गरेकोमा चालू आवको सोही अवधिमा घटेर ९ करोड ४२ लाखमा सीमित भएको हो । कम्पनीको चुक्तापूँजी १ अर्ब १० करोड रहेको छ भने जगेडामा रू। २० करोड २१ लाख र बीमा कोषमा ६४ करोड ३० लाख सञ्चित गरेको छ ।

त्यसैगरी, कम्पनीले चालू आवको दोस्रो त्रैमाससम्ममा ८४ करोड ६७ लाख कुल बीमाशुल्क आर्जन गरेको छ । यो बीमाशुल्क गत आवको दोस्रो त्रैमासको तुलनामा ९९ प्रतिशतले वृद्धि भएको हो । कम्पनीले गत आवको दोस्रो त्रैमाससम्ममा ४२ करोड ४८ लाख कुल बीमाशुल्क आर्जन गरेको छ ।

चालू आवको दोस्रो त्रैमाससम्ममा कम्पनीको प्रतिशेयर आम्दानी ९ दशमलव ४९ ९वार्षिक०, मूल्य आम्दानी अनुपात ८१ दशमलव शून्य २ गुणा र प्रतिशेयर नेटवर्थ १७८ दशमलव ५४ रहेको छ ।