निर्जीवन बीमा कम्पनीले सात महिनामा कति बढाए व्यवसाय ?

१९ फागुन, काठमाडौं । २० निर्जीवन बीमा कम्पनीहरुले चालु आर्थिक वर्षको सात महिना २२ दशमलव १२ प्रतिशतले व्यवसाय बढाएका छन् । चालु आवको सात महिनामा निर्जीवन कम्पनीले करिब २२ अर्ब रुपैयाँ कुल बीमाशुल्क आर्जन गरेका छन्।

बीमा समितिले उपलब्ध गरेको तथ्यांक अनुसार २० वटा निर्जीवन बीमा कम्पनीहरुले २१ अर्ब ८१ करोड रुपैयाँ कुल बीमाशुल्क आर्जन गरेका हुन्।

गत आर्थिक वर्षको माघसम्ममा निर्जीवन बीमा कम्पनीहरुले १७ अर्ब ८६ करोड रुपैयाँ कुल बीमाशुल्क आर्जन गरेको थियो।

कुल बीमाशुल्क आर्जनमा शिखर इन्स्योरेन्सले सबैभन्दा बढि बीमा शूल्क आर्जन गरेको छ । चालु आर्थिक वर्षको माघसम्ममा शिखरले २ अर्ब ७६ करोड ५४ लाख रुपैयाँ कुल बीमाशुल्क आर्जन गरेको छ। शिखर इन्स्योरेन्सले गत आर्थिक वर्षको माघसम्ममा २ अर्ब ४५ करोड रुपैयाँ मात्रै कुल बीमाशुल्क आर्जन गरेको थियो।

सगरमाथाले १ अर्ब ९५ करोड रुपैयाँ बीमाशुल्क आर्जन गरेको छ। यस्तै नेको इन्स्योरेन्स, सिद्धार्थ इन्स्योरेन्स, एनएलजी इन्स्योरेन्स र प्रिमियर इन्स्योरेन्को कुल बीमाशुल्क पनि एक अर्ब माथि रहेको छ।

सबैभन्दा कम बीमाशुल्क आर्जन गर्नेमा भने सानिमा जनरल इन्स्योरेन्स रहेको छ। सानिमाले यस अवधिमा ५२ करोड ७७ लाख रुपैयाँ मात्रै बीमाशुल्क आर्जन गरेको छ। यो कुल बीमाशुल्कको २.४२ प्रतिशत मात्रै हुन आउछ।