एमालेले चाह्यो भने देउवाले नेतृत्व गरेको खैँजडी सरकार सात दिनमा फालिदिन्छः ओली

२८ चैत, बझाङ । नेकपा एमालेका अध्यक्ष केपी ओलीले एमालेले चाहेमा कांग्रेस सभापति शेरबहादुर देउवाले नेतृत्व गरेको गठबन्धन सरकार एक हप्ता पनि नटिक्ने बताएका छन् ।

वर्तमान सरकारलाई ‘खैँजडी सरकार’ भन्दै ओलीले अझै पनि चुनाव सार्न खोजेको बताएका छन् । बझाङमा आयोजित कार्यक्रमलाई सम्बोधन गर्दै उनले यस्तो बताएका हुन् ।

यो सरकारले आफूलाई अजम्बरी नसोचे हुन्छ भन्दै उनले एमालेले चाह्यो भने सातदिनमा जरा उखेल्न सक्ने बताए । चुनाव विथोल्ने बहाना नहोस भनेर एमाले सहेर चुप लागेर बसेको ओलीको भनाई छ ।

उनले शेरबहादुर देउवा नेतृत्वको सरकारलाई ‘खैँजडी सरकार’ भन्दै अध्यादेश र नक्कली कानुन ल्याएर चुनाव सारेर लोकतान्त्रिक अभ्यास अन्त्य गर्न र देशलाई प्रतिगमनमा लैजान खोजेकाले यो प्रतिगामी सरकार भएको बताए ।

देउवा जहिले जहिले सरकारमा गए पनि लोकतन्त्र बुझाएको इतिहास रहेको बताउँदै ओलीले भने, ‘अहिलेका प्रधानमन्त्री जहिले सरकारमा जानुहुन्छ । उहाँले लोकतन्त्र बुझाउनुहुन्छ । प्रधानमन्त्रीज्यू यसपल्ट गठबन्धनलाई चेतावनी दिन चाहन्छु– चुनाव सार्ने खेल नहोस् ।’

एमालेले नेतृत्व गरेको समयमा मुलुकले उत्कृष्ट विकास गरेको ओलीको दाबी थियो । एमाले नेतृत्वको सरकार सधैँ निर्माण कार्य गरेर अर्थतन्त्रको विकास गर्ने तर अहिलेको गठबन्धन सरकारले अर्थतन्त्र समाप्त गरेको उनले बताए । उनले अहिलेको गठबन्धनलाई पाँच भाइको खन्चुवा गठबन्धन भएको संज्ञा दिए ।

वर्तमान सरकार चुनाव सार्ने कोसिस गरिरहेको समेत ओलीले आरोप लगाए । पाँच दलीय गठबन्धन जति ठूलो भएको भनिए पनि एमाले जति नपुग्ने उनको दाबी छ ।