उपचारका क्रममा महिलाको मृत्यु भएपछि भवानी अस्पतालमा तनाव

१४ बैशाख, बीरगञ्ज । पर्साको भवानी अस्पतालमा उपचारका क्रममा एक महिलाको मृत्यु भएपछि मृतक महिलाका परिवारजन र आफन्तले विवाद गर्दा तनाव भएको छ ।

भवानी अस्पतालमा ५ दिनदेखि उपचाररत बाराको विश्रामपुर २ का जंगबहादुर पण्डितकी पत्नी ३२ वर्षिया सीमा देवीको उपचारका क्रममा मङगलवार राति ११ बजे मृत्यु भएको हो ।

मृतक महिलाका आफन्त र परिवारजनले भने उपचारमा डाक्टरहरुले लापरवाही गरेका कारण महिलाको मृत्यु भएको आरोप लगाएका छन् । उनीहरुले अहिले अस्पताल अगाडि होहल्ला गर्दै प्रदर्शन गरेका कारण त्यहाँ तनाव भएको हो ।

उपचारमा संलग्न डाक्टरलाई कार्वाही हुनुपर्ने , मृतक महिलाका परिवारलाई अस्पतालले क्षतिपुर्ति उपलब्ध गराउनु पर्ने उनीहरुको माग छ ।
मृतक महिलाको शव, परिवारजनले बुझन् नमानेका कारण अस्पतालमै रहेको छ ।

पर्साका प्रहरी प्रवक्ता प्रहरी नायव उपरीक्षक ओमप्रकाश खनालले भने अस्पतालमा ५ दिनदेखि उपचाररत सीमा देवीको मङगलवार राति ११ बजे ब्रेन ह्याम्ब्रेजका कारण मृत्यु भएको डाक्टरले बताएको जानकारी दिए । महिलाको मृत्यु भएपछि परिवारजनले के कति कारणले मृत्यु भएको हो त्यसको जवाफ डाक्टरले दिनु पर्ने भन्दै होहल्ला गरेको खनालले बताए ।