एआईजीमा पौडेलको बढूवा सिफारिस, भावी नेतृत्वको लागि डीआईजी दाहालको छड्के नजर

२१ बैशाख, काठमाडौं । गृहमन्त्रालयले सशस्त्र प्रहरी बलका डीआईजी नारायणदत्त पौडैललाई एआईजी बढुवाका लागि सिफारिस गरेको छ । सशस्त्रमा रिक्त दुई एआईजी पदमा एक जनाको मात्र बढुवा सिफारिस गरिएको हो । वरियतामा अघि रहेका डीआईजी पौडेल एआईजीमा बढुवा सिफारीस गरिएपछि अझै एक पद रिक्त भएको छ ।

गृह मन्त्रालयमा बुधबार बसेको बढुवा समितिको बैठकले पौडेललाई एआईजीमा बढुवा गर्न सिफारिस गरेको थियो । पौडेललाई तीन वर्षपछि आईजीपी बनाउने गरी अहिले एआईजी बढुवा गरिएको हो । एआईजीको बढुवाका लागि चार जना डीआईजीले आवेदन दिएका भएपनि उनीहरु मध्ये एकजनालाई मात्रै सिफारिस गरिएको छ ।

डीआईजी पौडेलसहित चन्द्रप्रकाश (सीपी) गौतम, वंशीराज दाहाल र किशोर प्रधानले एआईजी बढुवाका लागि आवेदन दिएका थिए । त्यसमध्ये गौतम आईजीपीकै दावेदार थिए । तर उनलाई एआईजीमा पनि बढुवा गरिएन । उनको स्थानमा वंशी दाहालले दावी गरिरहेका छन् । दाहाल आफैमा विवादित पात्र भएपनि बढुवाका लागि आवेदन दिएका थिए ।

तत्कालिन सशस्त्र प्रहरी महानिरीक्षक पुष्पराम केसी र अर्का एआईजी रामशरण पौडेलले आइतबार अवकास पाएका थिए । केसीको ठाउँमा एआईजीमा बढुवा भएका राजु अर्याललाई सरकारले सशस्त्र प्रहरी महानिरीक्षक नियुक्त गरेको थियो । अर्याल र पौडेलको रिक्त एआईजी पदमा बढुवाको सूचना जारी गर्दा दाहाल र प्रधानले पनि आवेदन हालेका थिए ।

अव हुने एआईजीका लागि गौतम र दाहाल मध्ये एक जना एआईजी हुनेछन् । अर्याल र पौडेलले १८ चैत २०५४ मा नेपाल प्रहरीमा निरीक्षकका रुपमा सेवा थालेका थिए । अर्याल चार वर्ष आईजीपी भएर पदावधिका अवकाशमा गएपछि पौडेल अझै सेवा अविधका कारण संगठनमा रहनेछन् । दाहालले पनि आगामी नेतृत्वका लागि दावी गर्दै आवेदन दिएको स्वतः बुझिन्छ ।