भारतीय सेनाका चार वटा हेलिकोप्टरको सुरक्षासहित प्रधानमन्त्री मोदी लुम्बिनी आउदै

२ जेठ, काठमाडौं । प्रधानमन्त्री शेरबहादुर देउवाको निमन्त्रणमा भारतीय प्रधानमन्त्री नरेन्द्र मोदी आज लुम्बिनी भ्रमणमा आउँदैछन् । भारतीय सेनाका चार वटा हेलिकोप्टर मार्फत बिहान १० बजेर ४० मिनेटमा मोदी लुम्बिनी आउदैछन् । भारतीय प्रधानमन्त्री मोदीसहितको टोली चारवटा हेलिकप्टरमा भारतीय सुरक्षाकर्मी र मोदीका सहयोगीहरु पनि लुम्बिनी आउदैछन् ।

युनेस्कोले आयोजना गर्ने बुद्धजयन्ती सम्बन्धी कार्यक्रममा सहभागी हुन नेपाल आउन लागेका मोदी र नेपालका प्रधामन्त्री शेरबहादुर देउवाबीच द्धिपक्षीय छलफल हुने कार्यक्रम पनि तय भएको छ । छलफलमा दुई देशबीच पश्चिम सेती जलविद्युत आयोजनासहित विभिन्न पाँचवटा विषयमा सहमति जुटाउने प्रयास हुने बताइएको छ ।

सन् २०१९ मा दोस्रोपटक प्रधानमन्त्रीमा निर्वाचित भएयता मोदी पहिलोपटक नेपाल भ्रमण आउन थालेका हुन् । मोदी एकदिने लुम्बिनी भ्रमण सकेर आजै साँझ भारतको कुशीनगर प्रस्थान गर्ने कार्यक्रम रहेको छ ।

उनको सुरक्षाका लागि नेपाली सेना खटिएको छ । सरकारले २५६६ औं बुद्ध जयन्तीका अवसरमा नेपाल भ्रमण गर्न लागेका भारतीय प्रधानमन्त्री नरेन्द्र मोदीको सुरक्षाका लागि कमान्ड गर्ने जिम्मेवारी नेपाली सेनालाई दिएको हो । गृह मन्त्रालयका अनुसार सेनाको संयोजनमा सबै सुरक्षा निकायका अधिकारीहरू सुरक्षामा खटिएका छन् । ‘सुरक्षा व्यवस्था निकै चुस्तदुरुस्त छ। नेपाली सेनाको संयोजनमा नेपाल प्रहरी, सशस्त्र प्रहरी र राष्ट्रिय अनुसन्धान विभागका अधिकारीहरू खटिएका छन्,’ मन्त्रालयका प्रवक्ता फणीन्द्रमणि पोखरेलले भने। सुरक्षा व्यवस्थामा कुनै कमजोरी नभएको उनको भनाइ छ । सरकारले मोदीको सुरक्षा व्यवस्थाका लागि सबै सुरक्षा निकायलाई लुम्बिनीमा केन्द्रित गरेको छ। नेपाली सेना, नेपाल प्रहरी, सशस्त्र प्रहरी र राष्ट्रिय अनुसन्धान विभागका अधिकारीहरू लुम्बिनी पुगिसकेका छन्। लुम्बिनीमा गृह मन्त्रालयका प्रवक्तालगायत सुरक्षा अधिकारीहरूको संयुक्त बैठकसमेत बसेको थियो ।

मोदीको यस्तो छ भ्रमण कार्यतालिका

१०ः ४० मोदीको हेलिकप्टर अवतरण
११ः ०० मोदी मायादेवी मन्दिरमा पुग्ने
११ः ३० भूमि पूजा
१२ः १५ पवन इन्टरनेशलन होटलमा पुग्ने
१२ः २० परराष्ट्र मन्त्रालयका अधिकारीसँग छलफल
१२ः ३० प्रधानमन्त्री शेरबहादुर देउवासँग छलफल
१२ः ४५ डिलेगशन तहमा छलफपल
१२ः ३० प्रधानमन्त्री देउवाद्वारा दिवाभोज आयोजना
१४ः ०० नेपाल र भारतबीच द्धिपक्षीय छलफल
१५ः ३० बुद्धजयन्तीसम्बन्धी युनेस्कोको कार्यक्रममा सम्बोधन
१७ः ०० मोदी कुशीनगर प्रस्थान