भरतपुर महानगरमा मत बढाउँदै जगन्नाथ, गठबन्धनकी उम्मेदवार दाहाल दवावमा

३ जेठ, चितवन । नेपाली कांग्रेसबाट विद्रोह गर्दै स्वतन्त्र उम्मेदवारी दिएका जगन्नाथ पौडेल गठबन्धनकी उम्मेदवार रेनु दाहालका लागि भारी बनेका छन् । चितवनको भरतपुर महानगरपालिको प्रमुख पदका स्वतन्त्र उमेदवार पौडेलले निरन्तर मत संख्या बढाउँदै लगेका छन् ।

पैडेललाई एउटै वडाबाट १२ सयभन्दा बढी मत खसेको छ । सत्ता गठबन्धनकी उमदेवार रेनु दाहाललाई पौडेलले मत बढाउँदै लगेपछि एमालेका उमेदवार विजय सुवेदीसँग प्रतिस्पर्धा गर्न कठिन हुँदै गएको देखिन्छ ।

अहिलेसम्म पौडेलको भुइँकटहर चुनाव चिह्नमा वडा नम्बर एकमा ४३०, २ मा ४९४ र वडा–३ मा ६४८ मत र वडा नम्बर–४ मा एक हजार २१६ मत खसेको छ ।

पौडेलको गृहवडाको मतगणना हुन बाँकी छ । यसबाहेक वडा नम्बर–७, ६, १४ र १५ मा पौडेललार्य बढी मत खसेको अनुमान गरिएको छ ।

पौडेलको मत बढ्दा माओवादीकी दाहाललाई दवाव परिरहेको छ । १७ हजार २६६ मत गन्दा दाहालले पाँच हजार ७१८ मत पाएकी छन् । सुवेदीले पाँच हजार ६८९ मत ल्याएका छन् । स्वतन्त्र उमेदवार पौडेलले दुई हजार ७८८ मत प्राप्त गरेका छन् ।