नबिल र एनबी बैंकबीच हुने भनिएको बिगमर्जको मुद्दा लम्बियो, आज हेर्न नमिल्नेमा

४ जेठ, काठमाडौं । ठूलो तामझामका साथ गर्न लागिएको नबिल बैंक र नेपाल बंगलादेश बैंकबीचको बिगमर्ज बिरुद्ध परेको रिटको सुनुवाई आज पनि सरेको छ । सर्वोच्च अदालतका न्यायाधीशद्धय टंकबहादुर मोक्तान र मनोजकुमार शर्माको बेञ्चमा आज बुधबारका लागि तोकिएको मुद्धा हेर्न नमिल्नेमा राखिएको हाे ।

दुई ठूला बैंकको मर्जर रोक्न एनबी बैंकका संस्थापक लक्ष्मीबहादुर श्रेष्ठ समूहको कम्पनी दिवेश्वरी इन्भेष्टमेन्ट प्रालि र नेपाल पावर डेभलपमेन्ट एण्ड इन्भेष्टमेन्ट कम्पनीले दुई छुट्टाछुट्टै रिट अदालतमा हालेका थिए ।

सर्वोच्च अदालतमा परेको रिटको सुनुवाई हिजो मंगलबार कामु प्रधानन्यायाधीश दीपककुमार कार्की र न्यायाधीश प्रकाशकुमार ढुंगानाको इजलाशमा परेको थियो । तर नबिल बैंक र एनबी बैंकका तर्फबाट बहस गर्ने वकिलहरुले समय दिन नसक्दा हिजोको सुनुवाई आजका लागि सरेको थियो ।

यसअघि तत्काललाई मर्जर जेजस्तो अवस्थामा छ, त्यही अवस्थामा राख्नु भन्दै सर्वोच्चले आदेश दिएको थियो ।दुवै पक्षलाई डाकिएको संयुक्त इजलाशले अन्तरिम आदेश दिएमा तत्कालका लागि मर्जरको काम रोकिनेछ ।

अब अदालतले सम्भवत भोलिका लागि अर्को इजलाश तोक्ने छ । भोलि हुने इजलाशमा अदालतले वादी र प्रतिवादीका कुरा सुनिसकेपछि अन्तरिम आदेशलाई निरन्तरता दिए मर्जर प्रक्रिया रोकिनेछ भने रिट खारेज गरे मर्जर प्रक्रिया अघि बढ्नेछ । फैसलामा भईरहेको ढिलाईले बंगलादेश बैंकले बोलाएको विशेष साधारणसभा भने रोकिने भएको छ ।

दुवै संस्थालाई मर्जरका लागि राष्ट्र बैंकले सैद्धान्तिक स्वीकृति दिइसकेको छ । एनबी बैंकमा बंगलादेशी साझेदार आइएफआइसी बैंक ढाकाको ४०।८९ प्रतिशत शेयर छ । यो शेयर बिनोद चौधरीकी श्रीमती सारिका चौधरीले किन्ने गरी समझदारी भएको थियो ।