मर्जरका कारण १६ कम्पनीको शेयर कारोबार रोक्का

५ जेठ, काठमाडौं । मर्जर र प्राप्तिका कारण १६ कम्पनीको शेयर कारोबार रोक्का  छ । नेपाल स्टक एक्सचेञ्ज (नेप्से) का अनुसार तीन वाणिज्य बैंक, पाँच बीमा कम्पनी, ६ लघुवित्त कम्पनी र दुई जलविद्युत् कम्पनीको शेयर कारोबार मर्जर तथा प्राप्ति प्रयोजनका लागि रोकिएको हो ।

शेयर कारोबार रोक्का हुने तीन वाणिज्य बैंकमा नेपाल इन्भेष्टमेण्ट, हिमालयन र नेपाल बंगलादेश बैंक छन् । नेपाल इन्भेष्टमेण्ट बैंक र हिमालयन बैंकको मर्जर प्रयोजनका लागि २०७८ वैशाख ३१ गतेदेखि शेयर कारोबार रोक्का गरिएको हो ।

दुई कम्पनीबीचको मर्जर भाँडिइसकेको अवस्थामा पनि शेयर कारोबार खुला गरिएको छैन । नेप्सेले बैंकहरूबाट कारोबार खोलिदिन लिखित अनुरोध नआएकाले मर्जर भाँडिएको समाचार आए पनि कारोबार खुला हुन नसकेको बताएको छ ।

नबिल बैंकले प्राप्ति गर्न लागेको नेपाल बंगलादेश बैंकको शेयर कारोबार पनि २०७८ पुस ३० गतेदेखि रोक्का छ । पूँजी वृद्धि अभियान चलिरहेको बीमा क्षेत्रमा एभरेष्ट इन्स्योरेन्स र हिमालयन जनरल इन्स्योरेन्सले मर्जरमा जाने सम्झौता गरेका छन् । वैशाख २२ गते प्रारम्भिक मर्जर सम्झौता गरेका यी दुई कम्पनीको शेयर कारोबार वैशाख २३ गतेदेखि रोक्का छ । बीमा क्षेत्रकै ठूलो मर्जर सहमति युनियन लाइफ इन्स्योरेन्स, गुराँस लाइफ इन्स्योरेन्स र प्राइमलाइफ इन्स्योरेन्सबीच भएको छ ।

वैशाख २९ गते मर्जरसम्बन्धी प्रारम्भिक सहमतिपत्रमा हस्ताक्षर गरेका यी तीन कम्पनीको शेयर कारोबार भने ४ दिन लगातार सार्वजनिक बिदा परेकाले जेठ ३ गतेदेखि रोक्का भएको छ । यीबाहेक वोमी लघुवित्त, सूर्योदय लघुवित्त, नाडेप लघुवित्त, आँधीखोला लघुवित्त, घोडीघोडा लघुवित्त र समाज लघुवित्तको शेयर कारोबार पनि मर्जर तथा प्राप्तिकै निहुँमा रोक्का रहेको छ ।