विदेशी लगानीकर्ता सहजीकरणमा नबिल बैंक र लगानी बोर्डबीच सम्झौता

५  जेठ, काठमाडौं । नेपालमा लगानी गर्न खोजिरहेका विदेशी लगानीकर्तालाई सहजीकरण तथा प्रवद्र्धन गर्ने विषयमा नबिल बैंक र लगानी बोर्डबीच साझेदारी गर्ने सहमति भएको छ ।

नविल बैंकले विदेशी लगानीकर्तालाई वित्तिय सल्लाहकार सेवा प्रदान, प्रत्यक्ष वैदेशिक लगानी बढाउन नेपालमा लगानीका अवसरहरू देखाउने खालका विभिन्न कार्यक्रमहरूमा बोर्डसँग सहकार्य गर्ने सम्झौतामा उल्लेख छ ।

नबिल बैंक पूर्वाधार विकासमा विगत ३७ वर्षदेखि योगदान गर्दै आइरहेको छ । यसै क्रममा पूर्वाधार विकासमा लगानी बोर्डको कार्यालयले विगत १० वर्षदेखी नै निकै सहभागिता र सक्रियता देखाउँदै आएको छ ।

उक्त साझेदारीले विदेशी लगानीकर्ताहरूलाई आकर्षित गरी नेपालको आर्थिक विकासलाई संयुक्त रूपमा प्रवद्र्धन गर्ने र पूर्वाधार परियोजनाहरू, हरित क्षेत्रका अवसरहरू, ऊर्जा क्षेत्रको प्रवद्र्धन तथा यस्तै अन्य पूर्वाधारका कुराहरू विकास गर्न देशमा दिगो स्रोतको खाडललाई पूरा गर्न नबिल बैंक र लगानी बोर्ड नेपालको यो सम्झौताले टेवा पुग्ने बैंकले जनाएको छ ।

बैंकका प्रमुख कार्यकारी अधिकृत अनिल केशरी शाह र लगानी बोर्डका प्रमुख कार्यकारी अधिकृत सुशील भट्टबीच बुधबार समझदारीपत्रमा हस्ताक्षर भएको हो ।

विदेशी लगानी भित्र्याउन बैंकको महत्वपूर्ण भूमिका रहेका कारण लगानी बोर्ड नेपालको कार्यालयले पहिलोपटक नबिल बैंकलाई साझेदार बनाएको बताइएको छ ।

बैंकले दिगो बैंकिङसँगै दिगो देश बनाउन लगानी बोर्डको औपचारिक वित्तीय सल्लाहकार बैंकको रुपमा सम्झौता गर्न पाउँदा बैंक खुसि लागेको बताएको छ ।