ललितपुर महानगरका मेयर उम्मेदवार चिरिबाबु लागे विजय उत्सवको व्यवस्थापनतिर

१० जेठ, काठमाडौ । ललितपुर महानगरपालिकामा जित निश्चित भएपछि मेयरका उम्मेदवार चिरिबाबु महर्जन विजयी उत्सवको तयारीमा लागेका छन् । महानगरमा अब साढे ५ हजार मत गन्न बाँकी छ ।

गन्न बाँकीभन्दा चौबर मतले अग्रता लिएपछि कांग्रेस लगायत गठबन्धनका कार्यकताहरु विजयी उत्सवका लागि निर्वाचनको निर्वाचनको परिणाम घोषणा कुरिरहेका छन् ।

ललितपुरमा अहिलेसम्म ७९ हजार ८६३ मत गणना सकिएको छ । ८५ हजार ८६१ मत खसेको ललितपुर महानगरपालिकाको प्रमुखमा हालसम्म कांग्रेसका चिरिबाबु महर्जनले ३९ हजार २३२ मत ल्याएका छन् भने एमालेका हरिकृष्ण व्यञ्जनकारले २३ हजार ४९२ मत मात्र ल्याएका छन् ।

उपप्रमुखतर्फ एमालेकी मञ्जली शाक्यले २३ हजार ७३१ मत ल्याउँदा गठबन्धनका तर्फबाट माओवादी केन्द्रका उम्मेदवार बाबुराज बज्राचार्यले १७ हजार २६३ मत ल्याएका छन् । ललितपुर महानगरपालिकामा अहिले २७ र २८ को मतगणना जारी छ भने २९ को गन्ने तयारी भइरहेको छ ।

जम्मा ५ हजार ९९८ मत गन्न बाँकी रहेको र आज रातीसम्म मतपरिणाम आउने ललितपुरका मुख्य निर्वाचन अधिकृतको किरणप्रसाद शिवाकोटीले जानकारी दिए ।