सेवाग्राहीको चापका कारण राहदानी विभागले आइतबार बिदा नदिने

१२ जेठ, काठमाडौं । १२ जेठ, काठमाडौं । सेवाग्राहीको चाप बढिरहेको भन्दै राहदानी विभागले आइतबार कार्यलय बन्द नगर्ने भएको छ । सरकारले यही जेठ १ गतेदखि दुई दिन सार्वजनिक बिदा दिने निर्णय गरेको थियो ।

दुई दिन बिदा कार्यन्वयनमा लाँदा सेवाग्राहीका काम नभ्याइने अवस्था आएपछि आइतबार कार्यलय खुला राख्ने निर्णय विभागले गरेको हो । विभागले यही जेठ १५ देखि यो निर्णय कार्यन्वयनमा जाने जनाएको छ ।

विभागद्वारा विज्ञप्तीमा विद्युतीय राहदानी सहज रुपमा उपलव्ध गराउने नीतिअनुसार राहदानी विभागमा सेवाग्राहीको चाप उच्च भएकाले आइतबार बिदा दिन नमिल्ने बताएको छ । सार्वजनिक बिदाको दिन समेत राहदानी विभागले सेवा दिने बताइएको छ ।

१५ जेठदेखि अर्को व्यवस्था नभएसम्म प्रत्येक हप्ताको आइतबार बिहान १० बजेदेखि अपरान्ह ४ बजेसम्म विभाग खुल्ने विभागले जारी गरेको विज्ञप्तीमा उल्लेख छ ।

राहदानीको लागि आवेदन दिइ सम्बन्धित दिनको मिति र समय बुकिङ गर्नुहुने सेवाग्राहीहरुलाई उक्त समयमा विभागले राहदानी सम्बन्धी सेवा प्रदान गर्न गइरहेको विज्ञप्तीमा भनिएको छ ।