म्यादी सरकारले विपक्षीलाई संवादहीनतामा राखेर अर्थहीन नीति तथा कार्यक्रम ल्यायोः अध्यक्ष ओली

१२ जेठ, काठमाडौं । नेकपा एमाले अध्यक्ष केपी ओलीले सरकारले संसदमा पेस गरेको नीति तथा कार्यक्रममा सत्ता पक्षले विपक्षलाई अपमान गर्दै जेरी जस्तै बेरिएको अर्थहीन नीति तथा कार्यक्रम ल्याएको टिप्पणी गरेका छन् । उनले वर्तमान सरका म्यादी जस्तै भएको पनि बताए ।

प्रतिनिधिसभामा प्रस्तुत गरिएको आगामी आर्थिक वर्षको नीति तथा कार्यक्रममाथिको छलफलमा सहभागी हुँदै ओलीले नीति तथा कार्यक्रम चास्नीमा नडुबाएको जेरीजस्तो रहेको टिप्पणी गरेका हुन् ।

‘नीति तथा कार्यक्रम वर्णमालाका अक्षरहरू भित्र रहेर हेर्दा व्याकरणीय र वाक्य अशुद्धता, संगति नमिल्नु, चास्नीमा नडुबाएको तेलमात्र तारेको जेरी जस्तो, खल्लो, झुल्टिएको, चास्नीमा हाल्न नभ्याएको, अर्थ ननिस्कने छ,’ उनले भने, प्रस्थान विन्दु के हो ? आदि के हो, मध्य के हो ? थाहा छैन ।’

ओलीले सत्ता पक्षले प्रतिपक्षलाई सिध्याउन भन्दै राज्य संयन्त्रको दुरुपयोग गरेको बताए । नीति तथा कार्यक्रममाथि छलफलमा सत्ता पक्षले प्रतिपक्षलाई पेल्ने काम गरेको बताए । चुनावमा जित÷पराजित स्वाभाविक कुरा भए पनि सत्ता पक्षले एमालेलाई सिध्याउँछु भनेर लागेको उनको आरोप छ ।

ओलीले भने,‘सत्ता पक्षले यस पार्टीलाई सिध्याउँछु भन्छ, सिध्याउँछु भन्ने हक कहाँबाट आयो ? चुनावमा जित÷पराजय एउटा कुरा हो, पराजय भोगाउँछौँ, हामी जित्छौँ भन्न सकिन्छ तर सिध्याउँछौँ समाप्त पारिदिन्छौँ, धूलो चटाइदिन्छौँ, गायब पारिदिन्छौँ, टर्च बालेर खोज्न पर्छ भन्ने । टर्च बालेर नि भेटिँदैन होला होइन ।’

नेकपा एमाले सशक्त प्रतिपक्ष भएको र छिट्टै सरकारमा आउन सक्ने भन्दै ओलीले अपोजिसनलाई जहिले पनि गभर्नमेन्ट इन वेटिङ भन्ने कुरा सरकारले बिर्सिएको बताए । प्रतिपक्षलाई संवादहीनताको अवस्थामा राखेर पेल्ने काम गरिएको भन्दै उनले विभिन्न अन्तर्राष्ट्रिय सन्धि सम्झौता गर्दा प्रतिपक्षसँग छलफल नगरिएको दावी गरे ।

प्रतिपक्षलाई संवादहीनताको अवस्थामा राखेर पेल्ने काम गरिएको छ,’ उनले भने । त्यस्तै प्रतिपक्षविरुद्ध राज्य संयन्त्रको दुरुपयोग गरिएको पनि उनको भनाई थियो । उनले अहिलेको सरकारलाई म्यादी सरकारको संज्ञा दिए ।