स्कुलबाट रेष्टिकेट गरिदिने भन्दै धम्क्याएर बालिकालाई बलात्कार गर्ने प्रिन्सिपल पक्राउ

१२ जेठ, धरान । धरानमा स्कुलबाट रेष्टिकेट गरिदिने भन्दै धम्क्याएर बालिकालाई बलात्कार गर्ने एक स्कुलका प्रिन्सिपललाई प्रहरीको केन्द्रीय अनुसन्धान ब्यूरो ‘सीआईबी’ ले पक्राउ गरेको छ ।

जिल्लामा रहेको इटहरीको ब्लूमिङ लोटस इंग्लिस स्कुलको कक्षा ९ मा अध्ययरत विद्यार्थीलाई पाँच वर्षअघि बलात्कार गरेको अभियोगमा तत्कालीन ३६ वर्षीय राजकुमार खड्का प्रिन्सिपललाई सीआईबी’ ले पक्राउ गरेको हो ।

सामाजिक सञ्जालबाट यो घटना सार्वजनिक भएपछि सीआईबीको टोलीले टोखा नगरपालिकास्थित बानियाटारमा डेरामा बस्दै आएका खड्कालाई पक्राउ गरेको जनाएको छ ।

केही दिन अघि काठमाडौंमा सौन्दर्य प्रतियोगिताको नाममा प्रतिष्पर्धीलाई बलात्कार गरेको घटना सार्वजनिक भएको केही दिनपछि इटहरीको घटना पनि सामाजिक सञ्जालमार्फत सार्वजनिक भएको सीआईबीले जनाएको छ ।

प्रिन्सिपल समेत रहेका खड्कामाथि २०७४ साउन २६ गते सोही उपमहानगरपालिका-१३ स्थित एक गेस्ट हाउसमा पुर्‍याएर आफ्नै विद्यार्थीलाई स्कुलबाट रेष्टिकेट गरिदिने भन्दै धम्क्याएर बलात्कार गरेको आरोप लागेको छ । पक्राउ परेका खड्कालाई अहिले सुनसरी प्रहरीमा बुझाउन लगिएको सीआईबीले जनाएको छ ।