प्रेस युनियन विभाजनको संघारमा, जेठको अन्त्यमा नवौं महाधिवेशन गर्ने असन्तुष्ट पक्षको निर्णय

१३ जेठ, काठमाडौं । लोकतन्त्रवादी पत्रकारहरूको साझा संस्था नेपाल प्रेस युनियन विभाजनको संघारमा पुगेको छ । महाधिवेशन गराउने विषयमा संस्थापनपक्ष र इतरपक्षका बीच विवाद रहँदै आएको थियो ।

जेठ १३ र १४ गते हेटौंडामा गर्ने भनिएको नवौं महाधिवेशनको मिति एकल रूपमा भदौमा सारिएपछि यसबाट बनेको असन्तुष्ट पक्षले शुक्रबार बत्तीसपुतलीस्थित अनुपम फुडल्यान्डमा विशेष भेला आयोजना गरेको थियो । उक्त भेलाले युनियनको नवौं महाधिवेशन २८ र २९ जेठमा काठमाडौंमा गर्ने निर्णय गरेको हो ।

भेलाले नवौं महाधिवेशन सम्पन्न गर्न उपमहासचिव सलोजा दाहालको संयोजकत्वमा केन्द्रीय समितिका पदाधिकारी एवं सदस्यहरु सम्मिलित महाधिवेशन आयोजक समिति गठन गर्ने निर्णय गरेको छ ।

प्रेस युनियनको विधान संशोधनका लागि सचिव खिला कार्कीको संयोजकत्वमा विधान संशोधन समिति गठन गर्ने, केन्द्रीय सदस्य दीलिप पौडेलको संयोजकत्वमा आर्थिक समिति र केन्द्रीय सदस्य रमेश वाग्लेको संयोजकत्वमा सांगठनिक समिति गठन गर्ने निर्णय भएको बताइएको छ ।

यस्तो छ नेपाल प्रेस युनियनको विशेष भेलाको निर्णय
नेपाल प्रेस युनियनको नवौं महाधिवेशन २०७९ जेठ २८ र २९ गते काठमाडौंमा गर्ने । नवौं महाधिवेशन सफलताका साथ सम्पन्न गर्न उपमहासचिव सलोजा दाहालको संयोजकत्वमा केन्द्रीय समितिका पदाधिकारी एवं सदस्यहरु सम्मिलित महाधिवेशन आयोजक समिति गठन गर्ने । नेपाल प्रेस युनियनको विधान संशोधनका लागि सचिव खिला कार्कीको संयोजकत्वमा विधान संशोधन समिति गठन गर्ने । केन्द्रीय सदस्य दिलिप पौडेलको संयोजकत्वमा आर्थिक समिति र केन्द्रीय सदस्य रमेश वाग्लेको संयाजकत्वमा सांगठनिक समिति गठन गर्ने ।