स्याङ्जाको भीरकोटमा वडा स्तरीय शिक्षण सिकाइ सुधार तालिम सम्पन्न

३१ जेठ, स्याङ्जा । स्याङ्जाको भीरकोट नगरपालिकामा आयोजित दुई दिने वडा स्तरीय शिक्षण सिकाइ सुधार तालिम सम्पन्न भएको छ । भीरकोट-३ बाँस्तारा देउरालीस्थित शहिद शुक्र माध्यामिक बिद्यालयमा सम्पन्न तालिम जेठ २७ देखि २९ सम्म सञ्चालन गरिएको थियो ।

भीरकोट नगरपालिकाको मुख्य प्रायोजन र अध्ययन फाउण्डेशन काठमाडौंको सहप्रायोजनमा सो तालिम सम्पन्न भएको हो । तालिमको समापन सहमारोहलाई सम्बोधन गर्दै कायक्रमका प्रमुख अतिथि भीरकोट नगरपालिका वडा नं ३ का अध्यक्ष केशरबहादुर खड्काले शिक्षण सिकाइमा यस्ता तालिमहरुको ठूलो महत्व रहेको बताए ।

उनले आगामी दिनमा पनि स्थानीय सरकारले स्थानीय स्तरको आवश्यकतालाई ध्यानमा राखेर बहुआयामिक क्षेत्रमा प्रभाव पार्ने खालका गोष्ठी र तालिमहरुको आयोजना गर्नुपर्नेमा जोड दिए । कार्यक्रममा प्रमुख प्रशिक्षक शरणकुमार अर्यालले छोटो समयको तालिम पनि शिक्षण सिकाइका लागि महत्वपूर्ण हुने बताए ।

बिद्यालय व्यवस्थापन समितिका अध्यक्ष डम्बर बहादुर मल्लको सभापतित्वमा सम्पन्न सो कार्यक्रममा स्थानीय, विद्यालय शिक्षक, नेपाल मण्टेश्वरी एशोसिएसन काठमाडौंका कोषाध्यक्ष विष्णु आर्याल पोखरेल लगायतको उपस्थिति रहेको थियो भने तालिममा सात विद्यालयका ५५ जनाको सहभागिता रहेको थियो ।