सशस्त्रमा चार भाईको चार धाम यात्रा, रोल नं अझै अन्तिमतिर

४ असार, काठमाडौं । सशस्त्र प्रहरीमा नयाँ आईजीपी नियुक्ति भएको डेढ महिना पुगेपनि कामले गति लिन सकेको छैन । सशस्त्र प्रहरीमा सरुवा बढुवाका लागि प्रयत्न गरिरहेका आईजीपी राजु अर्यालले अझै गति लिन सकेका छैनन् । कामु एसएसपीहरु बल्लतल्ल बढुवा भएपनि एसपी, डीएसपीहरुको बढुवा अझै हुन सकेको छैन । डीएसपीबाट एसपीका लागि सूचना निस्केको १२ दिन हुँदा पनि बढुवाका लागि सिफारिस भएको छैन ।

खासगरी प्रधानमन्त्री शेरबहादुर देउवा र माओवादी अध्यक्ष प्रचण्ड नजिक छु भन्ने डीएसपीका कारण अहिलेसम्म बढुवा सिफारिस हुन नसकेको हो । सिंस ३ का तेस्रो लटमा बढुवा भएका दर्शन गिरी, चेतराज जोशी, लोकेन्द्र भट्ट,वासुदेव लोहनीका कारण अझै पनि विभागले सिफारिस गर्न नसकेको हो ।

उनीहरु बिहान–बेलुका शक्तिकेन्द्रमा धाएर सिंस ३ का पहिलो टोलीलाई बढुवा हुनबाट रोक्न खोजिरहेका छन् । चेतराज जोशीका बाबु शेरबहादुर देउवाका घरायशी पुरोहित हुन । उनी कमाण्ड कन्ट्रोलमा निकै कमजोर रहेका छन् । उनी इलाम गुल्ममा बस्दा काठ तस्करीमा मुछिएका थिए साथै पशुपति नाकाबाट तस्करी गराएको आरोप लागेको थियो । वासुदेव लोहनी तनहुको हुँ भन्दै कांग्रेसी नेताहरुको पहुँचमा रहेका छन् । उनी पनि कमाण्ड कन्ट्रोलमा निकै कमजोर रहेका छन् । लोकेन्द्र भट्ट सुदुरपश्चिमको नाता लगाएर नेताहरुको चाकडीमा पुग्ने गरेका छन् । ‘सशस्त्रले नेताहरुकोमा जान रोक लगाएको भएपनि गिरी, जोशी, भट्ट र लोहनी चार जना नेताकोमा दौडिएका छन्’, स्रोतले भन्यो ।

उनै डीएसपी गिरीले बढुवाको पूर्वसन्ध्यामा सामाजिक सञ्जालमार्फत् धम्कीपूर्ण भाषामा चेतावनी दिएको पनि स्रोतले जनाएको छ । आफूलाई माओवादी केन्द्रका अध्यक्ष पुष्पकमल दाहाल ‘प्रचण्ड’को स्वकीय सचिवालयसँग नजिक रहेको भन्दै दिनमा एकपटक खुमलटार पुग्ने गरेको र त्यहीबाट आईजीपी अर्याललाई फोन गरेर तनाव दिने गरेको पनि स्रोतले जनाएको छ । गिरीले केही दिन अघि ‘जे गर्नुभएको छ, सजिलै छाडिदैन’ भन्ने स्टाटस पोष्ट गरेर संगठन प्रमुखलाई धम्क्याएका थिए । उनी सिंस ३ को पनि तेस्रो लटको अन्तिममा भएकाले बढुवाको संभावना निकै कम भएपछि शक्तिकेन्द्रको शरणमा पुगेका हुन् ।

दुई वर्ष अघि नै कारवाहीमा परेकाले उनको बढुवा अझै केही समय नहुने भएपछि उनी आत्तिएका छन् । उनी धादिङमा बस्दा युवती काण्डमा पनि फसेका थिए । त्यो बेला निकै दौडधुप गरेर उनले युवती काण्डलाई सामसुम पारेका थिए । उनी केही समय रसुवामा पनि बसेका थिए । धेरै वटा लफडा भएपछि उनको सरुवा भएको थियो । अहिले भने उनको दिनचर्या खुमलटारमा वित्ने गरेको छ । सशस्त्र प्रहरी मूख्यालयले उनको गतिविधिबारे जानकार रहेको जनाएको छ ।