कांग्रेसबाटै कमिसनको आरोप र दवाव आएपछि तेलको मूल्य घटाउने तयारीमा मन्त्री बडू

१० असार, काठमाडौं । नेपाली कांग्रेसको दवावमा उद्योग, वाणिज्य तथा आपूर्तिमन्त्री दिलेन्द्रप्रसाद बडूले इन्धनको मूल्य घटाइने तयारी गरेका छन् । उनले नेपाल आयल निगमका कार्यकारी निर्देशन उमेश थानीलाई दुइदिनभित्र सञ्चालक समितिसँग छलफल गरी मूल्य घटाउन निर्देशन दिएको बताइएको छ ।

पेट्रोलियम पदार्थको मूल्य अन्तर्राष्ट्रिय बजारको अनुपातमा नघटाइएको र मूल्य बढाउदा कमिसन लिएको भनेर आलोचना भइरहंदा बडूले मूल्यमा अधिकतम कटौती गर्न निगमलाई निर्देशन दिएका छन् । तर, कति घटाउने भन्ने एकिन भएको छैन् । सम्भवतः शुक्रबार साँझ निगमले नयाँ मूल्यसूचि निकाल्ने तयारी गरिरहेको अधिकारीहरुले बताएका छन् ।

बिहीबार विहान कांग्रेस नेताहरुले बडूलाई तत्काल इन्धनको मूल्य घटाउने उपाय गर्न सुझाव दिएका थिए । मन्त्री बडूले पार्टीको दवावपछि करका दरमा समायोजन गरेर भए पनि पेट्रोलियम पदार्थको मूल्य समायोजन गर्ने मनस्थिति बनाएका हुन् । महामन्त्रीद्वय विश्वप्रकाश शर्मा र गगन थापाको दवावमा उनले अन्य विकल्पहरु खोजेर मूल्य समायोजन गर्ने पार्टीलाई जानकारी गरएका छन् ।

बिहीबारको प्रतिनिधिसभा बैठकमा पनि यो विषयमा प्रतिनिधिसभा सदस्यले ध्यानाकर्षण गराएपछि उनले विद्युतको खपत बढाएर पनि यसको मूल्यलाई सहज बनाउने प्रयासमा आफु रहेको र यहि अनुसार आयल निगमलाई निर्देशन दिएको बताएका थिए ।

आयल निकम कर्मचारीका अनुसार ‘पेट्रोलियम पदार्थको मूल्य समायोजन गर्ने विषयमा पार्टीले पनि ध्यानाकर्षण गराएको छ । मूल्यको समायोजनका लागि संसदमा जुन कुराहरु आएको छ । कर समायोजन गरेर भए पनि मूल्य घटाउनेतर्फ संसदमा कुरा उठेको छ । त्यसको सन्दर्भमा निगमले तयारी गरिरहेको छ ।’

मन्त्री बडूले यसबाहेक विद्युतको खपत बढाउने अर्को विकल्पका विषयमा नेपाल विद्युत प्रधिकरणका अधिकारीसँग पनि छलफल गर्दैछन् । शुक्रबार प्रधिकरणका अधिकारीहरसँग यस विषयमा छलफल हुने बताइएको छ ।