सम्बन्ध चिसिएका योगेशले किन लेखे ‘कमरेड माधव नेपाल र म ?’

१३ असार, काठमाडौं । नेकपा फुटेर एमाले र एमालेबाट फुटेर ‘नेकपा एकीकृत समाजवादी’ गठन हुनुपूर्वसम्म नेपाल निकट मानिएका एमाले नेता योगश भट्टराईले सोमबार आफ्ना पूर्व प्रिय नेता माधवकुमार नेपालसँगको आफ्नो सम्बन्धका बारेका सामाजिक सञ्जालमा असन्तुष्टि पोखेका छन् ।

हाल नेकपा एकीकृत समाजवादीका अध्यक्ष रहेका नेपाल एमालेमा रहँदासम्म उनको नजिक रहेर पार्टीभित्रै बिद्रोहका लागि सहयोग गरेका भट्टराईले अन्त्यमा आएर साथ छाडेका हुन् । अहिले पनि योगशलाई नेकपा एमालेभित्रै अध्यक्ष केपी शर्मा ओली खेमाभन्दा बाहिर रहेको नेताका रुपमा हेरिन्छ ।

माधव नेपाल एमालेमा रहँदा उनी निकट भनिएर चिनिएका प्राय नेताहरु अध्यक्ष ओलीको सामिप्यमा पुग्न सकेका छैनन् । त्यस मध्येकै एक नेता हुन् योगश भट्टराई पनि । तर, आज उनले नेपालको कार्यशैलीमाथि भन्दा पनि उनले आफुप्रति लगाएको अरोप र त्यसमा प्रयोग भएका भाषा र शैलीप्रति बढी चित्त दुखाएका छन् ।

शीर्ष मानिएका पुराना नेताहरुले बेलाबेलामा देखाउने व्यवहार, प्रयोग भएका शब्द र भाषामा नेता योगेशले जस्तै धेरैले टिप्पणी गर्दै आएका छन् । यसमा उनकै पार्टी नेकपा एमालेका अध्यक्ष सबैभन्दा अगाडी छन् । यस्ता छन् उनले सामाजिक सञ्जालमा लेखेका तर सम्पादन नगरिएका अंशहरुः

कमरेड माधव नेपाल र म !

कमरेड माधव नेपालले हामीमाथि पटक पटक भद्धा र असिस्ट टिप्पणी गर्नु भयो, वहाँको सम्मानका लागि हामीले कुनै टिप्पणी गरेनौं । अस्ती फेरी तल्लो स्तरमा झरेर बोल्नु भयो । अनि मैले वहाँ कै हित हुने गरी जीवनऊपयोगि जवाफ फर्काए । समाजवादीका युवाहरुको चित्त दुखेछ ! माफ गर्नुहोला, तपाईंहरुको चित्त दुखाउनु मेरो मनसाय होईन । अब उनीहरु खुशी हुनेगरी म भन्न चाहन्छु – ‘कमरेड माधव नेपाल दुईसय बर्ष बांच्नुहोस्, पदमा रहिरहनुहोस्, शुभकामना !’

कमरेड माधव नेपाल र मेरो सम्बन्धका बारेमा केही कुरा

१. पञ्चायतकालमा कमरेड रन्जनको उपनामले मैले कमरेड माधव नेपाललाई चिनेको हुँ । त्यतिबेला वहाँबाट थुप्रै प्रशिक्षण लिएको छु ।

२. वहाँमा थुप्रै राम्रा गुणहरु छन जसको खुलेर प्रशंसा गरेको छु भने कमजोरीको खुलेरै बिरोध गरेको छु । वहाँलाई चिनेदेखि वहाँ र मेरो सम्बन्धमा उतार चढाब रहेका छन र यो जारी रहने छ ।

३. नेकपा एमालेको पाँचौ महाधिवेशन ( २०४९ ) मा वहाँ अन्तिम तिर मात्रै जनताको बहुदलीय जनबादका पक्षमा खुल्नु भएको हो । हामी शुरु देखिनै मदन भण्डारीको नेतृत्व र बिचारलाई स्थापित गर्न लागेका हौ ।

४. छैठौ महाधिवेशनमा वहाँ पार्टीको महासचिब हुनुभयो । मेरो समर्थन वहाँलाई थिएन ।

५. सातौँ महाधिवेशनबाट वहाँ पुन पार्टीको महासचिब हुनुभयो । मेरो समर्थन वहाँलाई थियो ।

६. आठौ महाधिवेशनमा वहाँले आफ्नो धार बदल्नु भयो । हामी वहाँसँग लागेनौ ।

७. नवौ महाधिवेशनमा वहाँ पुरनै धारमा फर्कनु भयो । अध्यक्षको उम्मेदवार हुनुभयो । हामीले साथ दियौं । जित्नु भएन ।

८. प्रधानमन्त्री केपी ओलीका बिरुद्धको अबिश्वास प्रस्ताबमा हस्ताक्षर गर्न भन्नुभयो मैले मानिन र गरिन ।

९. नेकपा एमालेको बिभाजनको औचित्य छैन र यो नेपालको कम्युनिस्ट आन्दोलनलाई ध्वस्त गर्ने षड्यन्त्र हो भन्ने मेरो बुझाई रह्यो अलग पार्टी बनाउन वहाँलाई मैले साथ दिन सकिन । त्यसमा मलाई पछुतो छैन ।

१०. २०५३ सालमा म अखिलको अध्यक्ष थिएँ । राष्ट्रिय सम्मेलनबाट चुनिएको । वहाँ पार्टीको महासचिब । वहाँ र मेरो बिचमा समस्या उत्पन्न भयो । वहाँको दैनिक दबाब र असहयोगका कारण मैले अखिलको अध्यक्षबाट राजिनामा गरिदिएं ।
११. म मार्क्सवादी चेत भएको मानिस हुँ । मेरा गुरुहरुले मलाई ब्यक्ती, घटना र बिषयवस्तुलाई बुझ्ने आलोचनात्मक शिक्षा दिनुभएको छ । गुरुहरुप्रति मेरो सदा सम्मान छ । र मैले कमरेड माधव नेपाल लगायत सबैलाई यहि मार्क्सवादी दृष्टिकोणबाट हेर्ने गर्द्छु । म कसैको अन्ध समर्थक र अन्ध बिरोधी होईन ।

पुनश्चः कमरेड माधव नेपालसंग सवाल जवाफ गर्नु मेरो मनसाय होईन । २०७९ असार १३ गते बिहान काठमान्डौ– धनगढी हवाई यात्राको क्रममा तयार छोटो स्मरण ।