बुधबार शेयरबजार ४१ अंकले बृद्धि, एक अर्ब ४३ करोडको कारोबार

१५ असार, काठमाडौं । बुधबार शेयरबजार नेप्से परिसूचक ४१.३९ अंकले बढेको छ । दोहोरो अंकले बढेर नप्से १९६२.७१ को बिन्दुमा पुग्दा कारोबार रकम पनि अघिल्लो दिनको तुलनामा सुधारिएर एक अर्ब ४३ करोड १४ लाख पुगेको छ ।
बुधबार दोस्रो बजारमा २२८ कम्पनीको ४३ लाख ८६ हजार कित्ता शेयर २९ हजार ४३४ पटक खरिद बिक्री भएको थियो । कारोबारमा आएका सबै उपसमूह बढेको छ । साताको पहिलो कारोबार दिन आइतबार करिब ९५ अंकको अस्वाभाविक वृद्धि भएको नेप्सेमा सोमबार र मंगलबार घटेको थियो ।

बुधबार नेप्सेमा वृद्धि हुँदा सबै उपसूचक बढेका छन् । विकास बैंक र वित्त कम्पनी उपसूचक ४ प्रतिशतमाथिले वृद्धि हुँदा हाइड्रोपावर उपसूचक पनि करिब ४ प्रतिशत र व्यापार उपसूचक साढे ६ प्रतिशतमाथिले बढेको छ ।

कारोबार पनि करिब डेढ अर्ब पुगेको छ । आइतबार र सोमबार लगातार दुई दिन दुई अर्बमाथिको कारोबार भएको थियो । मंगलबार कारोबार एक अर्ब रुपैयाँमा सीमित भएको थियो । आज बजारमा कुल एक अर्ब ४३ करोड १४ लाख रुपैयाँको कारोबार भयो । ङ्यादी ग्रुप पावरको सर्वाधिक पाँच करोड ४३ लाखको शेयर कारोबार भएको छ ।

आज दिनभर बजारमा १९३ कम्पनीको शेयर कारोबार भएकामा १८१ कम्पनीको शेयर मूल्यमा वृद्धि भयो । नौ कम्पनीको शेयर मूल्य घटेको छ । १३ कम्पनीको शेयर मूल्य स्थिर रह्यो । आज कारोबार भएका मध्ये आँधीखोला लघुवित्त र सीवाईसी नेपाल लघुवित्तको शेयर मूल्य बढेर सर्किट लेभलमा बन्द भएको छ ।