सभापति देउवालाई तताउने कोइराला समूहको रणनीति, एजेण्डा तयार गर्न ३ बजे बैठक

१५ असार काठमाडौं । नेपाली कांग्रेसका सभापति शेरबहादुर देउवाले पार्टीको १४ औँ महाधिवेशन सकिएको यतिका समय वितिसक्दा पनि संगठन निर्माण तर्फ ध्यान नदिएको भन्दै आगामी रणनीति तय गर्न डा. शेखर कोइराला समूहले बिहीबार दिउँसो आफु पक्षीय नेताहरुको बैठक डाकेको छ ।

स्थानीय तह निर्वाचन सकिएको एक महिनाभन्दा बढी समय वितिसक्दा पनि पार्टीको आन्तरिक संरचना तयार गरी चलायमान बनाउने विषयमा पार्टी सभापति देउवाले सुरसारनै नगरेपछि उनलाई दवाव दिने एजेण्डाका विषयमा छलफल गर्न कोइराला समूहको बैठक बस्न लागेको हो ।

नेपाली कांग्रेसको वर्तमान कार्यसमिति निर्वाचित भएको ६ महिना वितिसकेको छ । १० पुस २०७८ मा पार्टी सभापति शेरबहादुर देउवासहित पार्टी पदाधिकारी र निर्वाचित केन्द्रीय सदस्यहरूले चारवर्षे कार्यकालका लागि सपथ लिएका थिए । तर, सपथ लिएको छ महिना बितिसक्दासमेत पार्टी विधानसम्मत् सञ्चालन हुन सकेको छैन ।

यसै विषयमा छलफल गर्न नेता कोइराला पक्षको बैठक आज बस्ने भएको हो । प्रधानमन्त्री एवं पार्टी सभापति शेरबहादुर देउवाले विधानको कार्यान्वयन र भ्रातृसंस्थाको नेतृत्व एकलौटी चयन गरेको लगायतका विषयमा यो समूहले आन्तरिक छलफल गर्नेछ । बैठक दिउँसो ३ बजे काठमाडौंको बत्तीसपुतलीस्थित अनुपम फुडल्यान्डमा बस्ने जनाइएको छ ।