कांग्रेसको निर्णयले विपक्षी एमाले दवावमा, सिट बाँडफाँडबारे सत्ता गठबन्धनमा छलफल सुरु

३ साउन, काठमाडौं । आगामी निर्वाचनमा अहिलेकै गठबन्धनलाई निरन्तरता दिने नीतिगत सहमतिमा पुगेसँगै सत्तारूढ पाँचै दलले तालमेलको मोडालिटी र सिट बाँडफाँड बारे छलफल सुरु गर्ने भएका छन् । सुरुमा शीर्ष तहमा छलफल गर्ने, त्यसका आधारमा आ–आफ्ना पार्टीभित्र छलफल गर्ने र त्यसपछि औपचारिक निर्णयमा पुग्ने उनीहरूको योजना छ ।

यता, नेपाली कांग्रेसको केन्द्रीय समिति बैंकले आगामी निर्वाचनमा सत्ता गठबन्धनमा रहेका दलहरुबीच तालमेल गरेर जाने निर्णय गरेपछि प्रतिपक्षी दल नेकपा एमाले दवावमा परेको छ । स्थानीय तहमा एमाले एक्लैले ३४ प्रतिशत मत प्राप्त गरेकाले बहुमतका लागि बाँकी १६ प्रतिशत बढाउने गरी बाम गठबन्धन गर्ने तयारीमा रहेको एमालेका लागि कांग्रेसको यो निर्णय भारी हुने देखिएको छ ।

पाँचदलीय गठबन्धन तालमेलको बिन्दुमा पुगेपछि एमालेमाथि ठूलो अंकगणितीय दबाब पैदा भएको छ । कांग्रेसले प्रदेश र संघीय निर्वाचनमा अहिलेकै गठबन्धनसहित जाने निर्णय लिएसँगै प्रमुख प्रतिपक्षी एमाले दबाबमा परेको हो । गठबन्धनकै कारण स्थानीय निर्वाचनमा अपेक्षाकृत नतिजा पाउन नसकेको एमालेलाई कांग्रेसको पछिल्लो निर्णयले झनै अप्ठ्यारोमा पारेको छ ।

हुन त आगामी निर्वाचनमा एक्लै प्रतिस्पर्धा गर्ने गरी चुनावको तयारी गर्न उसले तल्ला निकायलाई निर्देशन दिएको छ । तर, सर्तसहित तालमेलको ढोका पनि बन्द गरेको छैन । पाँच दलीय गठबन्धनमा जटिलता रहे पनि आवश्यकता भएकाले मापदण्ड बनाएरै तालमेलको औपचारिक निर्णय हुने नेताहरूले बताएका छन् । कांग्रेसबाहेकका दलले तालमेल सम्मानजनक हुनुपर्नेमा जोड दिएका छन् ।

माओवादी नेता हरिबोल गजुरेलले जटिलताका बाबजुद गठबन्धन आजको आवश्यकता रहेको र आजबाट सिट बाँडफाँडका विषय छलफल सुरु हुने बताए । गत २३ असारमा सम्पन्न माओवादीको केन्द्रीय समिति बैठकले वर्तमान गठबन्धनलाई प्रभावकारी बनाउन जोड गर्ने निर्णय गरेको थियो । तत्काल प्रतिगामी र दक्षिणपन्थी शक्तिका विरुद्ध तात्कालिक जिम्मेवारी संविधानको रक्षा, शान्तिप्रक्रियाको पूर्णता एवं संघीयतासहितको लोकतन्त्रमा सहमत शक्तिसँग गठबन्धनको नीति अख्तियार गरिने निर्णय माओवादी केन्द्रले गरेको थियो ।

सत्तागठबन्धनको अर्को दल एकीकृत समाजवादीले पनि वर्तमान गठबन्धन राष्ट्रिय आवश्यकता भएको बताएको छ । एकीकृत समाजवादीका महासचिव डा. बेदुराम भुसालका अनुसार गठबन्धन सबै दललाई आवश्यक छ । प्रदेश सभा र प्रतिनिधिसभा निर्वाचनमा पाँचदलीय गठबन्धन नै कायम रहन्छ र आजैबाट शीर्ष नेताहरु यसको आन्तरिक छलफलमा जुट्ने छन् ।

एकीकृत समाजवादीको गत १३ र १४ असारमा बसेको राष्ट्रिय परिषद् बैठकले पाँचदलीय गठबन्धन अहिलेको आवश्यकता भएको निष्कर्ष निकालेको थियो । बैठकले प्रतिगामी, पुनरुत्थानवादी तथा दक्षिणपन्थीहरूबाट लोकतन्त्र, संघीयता, धर्मनिरपेक्षता, संविधान र जनताको सर्वभौमिकतामा प्रहार हुन सक्ने स्थितिप्रति सजग रहँदै वाम–लोकतान्त्रिक गठबन्धनमा रहेका दलसहित सम्पूर्ण लोकतान्त्रिक शक्तिलाई एकजुट हुन आह्वान गरेको थियो ।

सत्तागठबन्धनको अर्को दल जसपाले पनि आगामी निर्वाचनमा वर्तमान गठबन्धनलाई नै निरन्तरता दिने निर्णय गरिसकेको छ । गत २९ र ३० असारमा वीरगन्जमा बसेको जसपा केन्द्रीय कमिटी बैठकले आगामी प्रतिनिधिसभा र प्रदेश सभाको निर्वाचनमा पाँचदलीय गठबन्धनलाई निरन्तरता दिने निर्णय गरेको हो ।

जनमोर्चाले पनि पाँचदलीय गठबन्धनलाई नै निरन्तरता दिने निर्णय गरेको छ  । आगामी निर्वाचनमा तालमेलको विषय जटिल भए पनि सबै दलको सहमतिमा टुंगो लगाइने र गठबन्धनमा अन्य दल पनि वर्तमान गठबन्धनकै पक्षमा उभिने कांग्रेसको विश्वास छ । ०७४ को निर्वाचनमा एमाले र माओवादीले ६०÷४० को अनुपातमा सिट बाँडेर वाम गठबन्धन गरेका थिए, पाँचदलीय गठबन्धनका लागि सिट बाँडफाँड जटिल विषय बन्ने सबै दलले अनुमान गरेका छन् ।

पाँच दलको गठबन्धन निरन्तरतापछि लोकतन्त्र र राष्ट्रियतालाई बलियो बनाउने उद्देश्यमा सहमत हुने जुनसुकै शक्तिसँग तालमेलका लागि छलफल गर्ने र एक्लै गठबन्धनको सामना गर्ने गरी तयारी अगाडि बढाउने एमालेको रणनीति छ । यसैअनुसार उसले सातै प्रदेशमा संघ र प्रदेश निर्वाचनलक्षित प्रशिक्षण सुरु गरेको छ । सोमबार मधेस प्रदेशको जनकपुरमा प्रशिक्षण आयोजना गरेको एमालेले ८ साउनमा गण्डकी प्रदेशमा प्रशिक्षण कार्यक्रम राखेको छ ।