लुम्बिनीका तीन जिल्लामा व्यापक तस्करी शुरु, डामेर छाडेका साँढेजस्ता यी घुमुवा

२२ साउन, बुटबल । स्थानीय चुनाव सकिएको चार महिना नबित्दै देशमा संघीय र प्रदेशसभाको चुनावी माहोल सिर्जना भएको छ । चुनावमा नेपाल प्रहरीको प्रमुख काम शान्तिसुरक्षा कायम गर्दै निश्पक्ष र भयरहित वातावरणमा निर्वाचन सम्पन्न गर्नु हो । तर लुम्बिनी प्रदेश प्रहरी कार्यालय र मातहतका प्रहरीहरुको ध्यान भने सीमा नाकाबाट तस्करी र अवैध धन्दा चलाएर उठ्तीपुठ्तीमा व्यस्त रहेको देखिएको छ ।

समाचार अनुसार यतिबेला लुम्बिनी प्रदेशका तीन जिल्ला रुपन्देही, पश्चिम नवलपरासी र कपिलवस्तुबाट व्यापक मात्रामा तस्करी धन्दा मौलाएको छ । यो तस्करी धन्दामा नेपाल प्रहरी र सशस्त्र प्रहरीको प्रदेश नेतृत्व र जिल्ला तहको नेतृत्व मात्र होइन बीओपी र सीमा प्रहरी कार्यालयका प्रमुखहरुकै संलग्नता देखिएको छ । अझ जिल्ला र प्रदेश प्रहरी प्रमुखले त घुमुवा परिचालन गरी तस्करबाट हप्तावारी र महिनावारी समेत असुल्दै आएका छन् ।

“जो रक्षक उही भक्षक” भने झैं लुम्बिनी प्रदेशका प्रहरीहरुले तस्करी धन्दालाई लाइन दिएवापत मासिक रुपमा लाखौं रुपैयाँ असुल्दै आएका छन् । यसबाट सरकारलाई प्राप्त हुने करोडौंको राजश्व असुलीमा समेत असर पुगेको भन्सार विभाग स्रोतले जनाएको छ । समाचार स्रोतका अनुसार अहिले पश्चिम नवलपरासीको भुजहवा नाकाबाट भारतीय अखाद्य माछाको तस्करी व्यापक मात्रामा भईरहेको छ । कन्हैया केवट नामका तस्करले सो नाकाबाट दैनिक ३/४ पिकअप माछा बिना क्वारेन्टाइन नेपाल भित्र्याउने गरेका छन् ।

रुपन्देही, पश्चिम नवलपरासी र कपिलवस्तुबाट तस्करहरुले सटिङ सुटिङका कपडा, हाडैवेयर, मोटरपार्टस, कुर्ता एवं सारी र रक्सीको कारोवार भैरहेको छ । नुनदेखि सुनसम्म ओर्साने तस्करहरुले यसवापत नेपाल प्रहरी रसशस्त्र प्रहरीलाई मासिक लाखौं रुपैयाँ दिने गरेको बताइन्छ । अझ माछा तस्करले त भारतीय माछालाई नेपालकै पोखरीमा उत्पादन भएको नक्कली भ्याट बिल बनाएर काठमाडौं पोखरासम्मका बजारमा पठाइरहेको छ । स्मरणीय के छ भने भारतीय माछा नेपाल भित्र्याउन प्रतिबन्द लगाइएको छ । भन्सार तिरेर पनि सो माछा नेपाल भित्र्याउन पाइदैन् । आम जनताको जनस्वास्थ्यमाथि गम्भीर खेलबाड हुँदा समेत सरकार रमिते बनेको छ भने नियन्त्रणको जिम्मा पाएको सशस्त्र प्रहरी र नेपाल प्रहरी तस्करको चास्नीमा डुबेर मस्ती गरिरहेका छन् ।

यस्तै पश्चिम नवलपरासीबाट भारतीय चिनी नेपाल भित्र्याएर पल्टी गरि देशभर पठााइएको छ । चाडवाडको बेला भएकाले पनि चिनीको खपत यो बेला निकै हुने गर्दछ । त्यसैगरी कपिलवस्तुको कृष्णनगर,चाकर चौराहा, मर्यादाापुर र रंगपुर सीमा नाकाबाट व्यापक मात्रामा तस्करी मौलाएको समाचार छ ।

घुमुवाको राज, हेडक्वार्टर नीति रद्धीको टोकरीमा

नेपाल प्रहरी र सशस्त्र प्रहरीका नयाँ आईजीपी धीरजप्रताप सिंह र राजु अर्यालले बहाली गरेपछि कहीकतै पनि घुमुवा नराख्ने र काजमा नखटाउने भन्दै देशभरका मुजकर कार्यालयमा परिपत्र गरेका थिए । तर हेडक्वार्टरको सो परिपत्र रद्धीको टोकरीमा मिल्काउँदै प्रदेश प्रहरी प्रमुख र जिल्ला प्रमुखहरुले काजमा तानेरै भएपनि घुमुवा खटाउने र तस्करीलाई मलजल गर्ने कार्य जारी राखेका छन् । यसको गतिलो उदाहरण कपिलवस्तु र पश्चिम नवलपरासीका केही तथ्य हेरे पुग्छ ।

जिल्ला प्रहरी कार्यालय कपिलवस्तमा बिगत १५ बर्षदेखि एकछत्र घुमुवाको रुपमा प्रहरी सहायक निरीक्षक (असई) श्यामसिंह चौधरीको रजगज चलिरहेको छ । कपिलवस्तु कै स्थानीय बासिन्दासमेत रहेका असई चौधरीको दरबन्दी भने रुपन्देहीको खैरेनी इप्रकामा रहेको छ भने जवान कुर्मीको दरबन्दी पश्चिम नवलपरासी रहेको छ । उनको कमाण्डमा प्रहरी हबल्दार दीपेन्द्र यादव र प्रहरी जवान नरेश कुर्मीसहितको ५ जनाको टोली घुमुवाको रुपमा परिचालित छन् ।

जिल्लामा जो नयाँ प्रहरी प्रमुख भएर आएपनि उनकै खोजी हुने गरेको छ । किनकी तस्करबाट कुस्त रकम उठाउन र हाकिमलाई बुझाउने सार्मथ्य उनीबाहेक अरुसँग बिरलै रहने गरेको एक प्रहरी अधिकृतले नाम उल्लेख नगर्ने शर्तमा नेपालबहसलाई बताए । त्यसैले उनी डामेका साँढे जस्तो गरी कपिलवस्तुमा बस्ने गरेको उनले बताए । जिल्लादेखि हेडक्वार्टरसम्म मिलाएर उनी निर्धक्क बिगत १५ बर्षदेखि बसिरहेका छन् । मिडियामा समाचार आएपछि २/४ महिना बाहिर जाने अनि पुन कपिलवस्तु नै फर्कने गरेका उनकी श्रीमति समेत सोही जिल्लामा प्रहरी हबल्ल्दारका रुपमा कार्यरत रहेकी छन् । जबकी हेडक्वार्टरको नियममा गृहजिल्ला बस्न नपाइने भनिएको छ ।

यस्तै कपिलवस्तुको मुख्य तस्करी हुने नाका कृष्णनगर ईलाका प्रहरी कार्यालयमा बिगत १० बर्षदेखि असई मुकेश यादव कार्यरत छन् । उनको दरबन्दी पनि नवलपरासी रहेको छ । सधैं हाकिमको नजिक रहेर सिभिलमा काम गर्ने यादवको उठतीपुठती निकै रहेका बताइन्छ ।
अझ सबैभन्दा डामेर छाडेको साँढेको उपमा पाएका प्रहरी सहायक निरीक्षक (असई) हुन् सन्तोष रायमाझी ।

बिगत लामो समयदेखि प्रदेश प्रहरी कार्यालयको घुमुवाको रुपमा परिचित रायमाझीले रुपन्देही, पश्चिम नवलपरासी र कपिलवस्तु हेर्ने गरी डीआईजीको खास मान्छेका रुपमा खटिएका छन् । संघीय प्रदेश प्रहरी कार्यालय लुम्बिनी दरबन्दी भएपनि हालै उनले परासी काज गराएर डीआईजीको घुमुवाको रुपमा खटिएका छन् । ६/७ महिना अघि विवादमा परी हेडक्वार्टर तानिएका उनी पुन लुम्बिनी प्रदेश फर्किएर तस्करको लाइन मिलाउनै व्यस्त रहने गरेको बताइन्छ । ब्रेजा गाडी चढेर ठाँटसँग हिडेने उनको चर्तिकला हेर्न लायकको छ ।