गठबन्धनमा सकस हुँदा एमाले राप्रपा नजिकिदै

२९ साउन, काठमाडौं । सरकारका रहेका पाँच दलीय गठबन्धन कसिलो बन्न थालेपछि एमाले अध्यक्ष केपी ओली र राष्ट्रिय प्रजातन्त्र पार्टी (राप्रपा) का अध्यक्ष राजेन्द्र लिङ्देन एकअर्कामा नजिक हुन थालेका छन् । बालुवाटारका पाँच दलका नेताहरुले एमालेसहितको संख्या जोडेर सिट संख्या बाँडफाँडको तयारी गरिरहेको बेला बालकोटमा राप्रपाका अध्यक्ष लिङ्देनले गएर भेटघाट गरेपछि नजिकिएको आभाष भएको छ ।

अध्यक्षद्वयबीच शुक्रबार ओली निवास बालकोटमा भेटवार्ता भएको हो । भेटवार्तामा एमाले र राप्रपाकाबीच चुनावी तालमेलका विषयमा छलफल भएको बताइएको छ । ‘भेटवार्तामा चुनावी तालमेल र सहकार्यका विषयमा सामान्य छलफल भएको र त्यसका लागि संवाद सुरु भएको छ’ राप्रपाका प्रवक्ता मोहन श्रेष्ठले भने ।

राष्ट्रिय प्रजातन्त्र पार्टीले सबैसँग संवादको ढोका खुल्ला राखेको उनले बताए । यसबारेमा पार्टीको अब बस्ने केन्द्रीय कार्य सम्पादन समितिको बैठकले थप निर्णय गर्ने उनले बताए । अध्यक्षद्वय ओली र लिङदेनबीच स्थानीय निकायको निर्वाचनपछि पहिलोपटक भेटवार्ता भएको हो । भेटवार्ताका लागि अध्यक्ष लिङ्देन ओली निवास बालकोट पुगेका थिए ।

स्थानीय चुनावमा एमालेले राप्रपाबाट फुटेर बनेको राप्रपा नेपालसँग केही स्थानमा तालमेल गरेको थियो । तर निर्वाचनको परिणाम हेर्दा राप्रपा नेपालसँग उल्लेख्य जनमत देखिएन । त्यसैले संघीय र प्रदेश चुनावमा एमाले राप्रपातिर मोडिने सम्भावना बढेको स्रोतको दावी छ । एमाले अध्यक्ष ओली र राप्रपा अध्यक्ष लिङदेन एउटै जिल्लावासी पनि हुन् । अघिल्लो चुनावमा दुवै नेताले एक–अर्कालाई सघाएका थिए ।

तर राष्ट्रिय सभाको चुनावमा एमालेलाई साथ नदिएपछि ओली राप्रपासँग रुष्ट बनेका थिए । त्यही आवेगमा उनले स्थानीय तहको चुनावमा राप्रपालाई पन्छाएर राप्रपा नेपालसँग तालमेल गरेका हुन । लिङ्देन बालकोट पुग्नुअघि राप्रपाका नेतृद्वय रेखा थापा र कुन्ती शाहीले पनि अध्यक्ष ओलीसँग भेटघाट गरेका थिए ।

बिहिबार नेकपा एमालेको सचिवालय बैठकमा ओलीले अबको चुनाव चुनौतिपूर्ण रहेको बताउदै एकल रुपमै निर्वाचनमा जानुपर्ने अवस्था आएको बताएका थिए । उनले नेता कार्यकर्तालाई गठबन्धन भन्दा पनि एक्लै निर्वाचनमा जान सकिने र त्यही अनुसारको तयारी गर्न निर्देशन दिएका थिए ।

सरकारले चुनाव घोषणा गरेसँग चुनावी सरगर्मी पनि बढेको बेला सत्ता गठबन्धन दलहरुलाई सीट बाँडफाँडमा सकस देखिएको छ । सरकारले चुनावको मिति घोषणा गरेपछि दुई पटक बसेको सत्ता गठबन्धन दलको बैठकमा शीर्ष नेताहरुलाई केन्द्रमा राखेर भागवण्डा गर्दा सीट बाँडफाँडमा सकस देखिएकै अवस्थामा एमाले र राप्रपा एक आपसमा नजिक देखिएका छन् ।

शीर्ष नेताहरुमध्ये प्रधानमन्त्री शेरबहादुर देउवाबाहेक अन्य कोही पनि नेताहरु आफ्नो क्षेत्रमा सुरक्षित नदेखिदा गठबन्धनकै भर परेको अवस्थामा एमाले राप्रपाले तालमेल गरेमा एमालेलाई फाइदा हुने अवस्था देखिएको छ ।