नेसपाका नेताहरु माओवादीकै चुनाव चिह्नमा निर्वाचन लड्ने

२९ साउन, काठमाडौं । आम निर्वाचनमा नेपाल समाजवादी पार्टीका नेताहरु माओवादी केन्द्रको चुनाव चिह्नमा निर्वाचन लड्ने भएका छन् ।

आइतबार दुई दलका शीर्ष नेताहरुबीच भएको भेटवार्तामा गठबन्धन बनाउने र एउटै चुनाव चिह्न लिएर संयुक्त रुपमा निर्वाचनमा जान दुबै दल सहमत भएका हुन् ।

भेतवार्तामा माओवादी अध्यक्ष पुष्पकमल दाहाल ‘प्रचण्ड’ र समाजवादी पार्टीका अध्यक्षद्वय डा. बाबुराम भट्टराई र महेन्द्र राय यादव सहभागी भएका थिए ।

माओवादी नेताहरुका अनुसार नेसपाका नेताहरुले प्रतिनिधिसभामा केही सिट निश्चित गर्नुपर्ने बताएका छन् । नेसपाका अध्यक्ष भट्टराई गोरखा क्षेत्र नम्बर २ र यादव सर्लाही ४ बाट प्रत्यक्ष निर्वाचित सांसद हुन् ।

जसपामा असन्तुष्ट रहेका कतिपय सांसद पनि आफूहरुको सम्पर्कमा रहेका नेसपाका नेताहरु बताउँछन् । नेकपाका एक पदाधिकारीका अनुसार भोलि साँझसम्म लिखित सहमति गर्ने तयारीका साथ गृहकार्य भइरहेको छ । तीन नेताबीच भएको भेटमा सत्तारुढ गठबन्धनमा नेसपाको सहभागिताबारे पनि कुराकानी भएको बताइएको छ ।