कांग्रेस बारामा चर्कियो विवाद, सहमहामन्त्रीद्वय चौधरी र मन्सुरका फरक-फरक सिफारिस

२१ भदौ, बारा ।  बारा जिल्लामा प्रदेश र प्रतिनिधिसभा सदस्यका लागि उम्मेदवार सिफारिसमा चर्को विवाद देखिएको छ । नेपाली कांग्रेस सभापति शेरबहादुर देउवा पक्ष र नेता कृष्णप्रसाद सिटौला पक्षबीच नाम छनोट गर्ने विषयमा सहमति नजुटेपछि विवाद चर्किएको हो ।

नेताहरुमै व्यक्तिवाद र गुटगत मनोवृत्ति बढेका कारण विवाद बढ्दै जाँदा चरम गुटबन्दीसमेत भएको छ । बारामा कांग्रेस सहमहामन्त्री उमाकान्त चौधरी र अर्का सहमहामन्त्री फरमुल्लाह मन्सुरको दुई गुट रहेको छ । मन्सुर सभापति देउवा निकट मानिन्छन भने चौधरी कृष्णप्रसाद सिटौला निकट मानिन्छन् ।

बारामा केन्द्रीय गुटको समीकरणभन्दा निकै फरक देखिएको छ । केन्द्रमा देउवा र सिटौला सँगै छन् । देउवा निकट सभापति राजेश राय यादव जिल्लामा चौधरीसँग छन् । मन्सुरले भने देउवा गुटका जिल्ला सभापतिबाहेकका अन्य नेतालाई साथमा लिएर हिँडेका छन् ।

आगामी ४ मंसिरमा हुन लागेको प्रतिनिधिसभा र प्रदेशसभा सदस्य पदका आकांक्षीहरूको नामावली सिफारिस गर्ने क्रममा कांग्रेस बारामा विवाद भएको हो । विवादपछि सभापति र उपसभापतिको छुट्टाछुट्टै बैठक बसी आ–आफ्नो पक्षका नेताको नाम सिफारिस गरिएको छ ।

उम्मेदवार सिफारिस गर्ने क्रममा विवाद हुँदा छुट्टाछुट्टै जिल्ला कार्यसमितिको बैठक बसेर नाम सिफारिस भएको कांग्रेस बाराका सचिव राजेश रौनियारले बताए । जिल्ला अध्यक्ष राजेश राय यादवले आफू अनुकूलका नाम सिफारिस गरेका छन् भने अर्को समूहका उपसभापति मनोज भट्टलगायतका कार्यसमितिले फरक नाम सिफारिस गरेको छ ।

यादव पक्षले प्रतिनिधिसभा क्षेत्र नम्बर १ बाट प्रत्यक्षतर्फ उमाकान्त चौधरीको एकल नाम सिफारिस गरेको छ । उपसभापति भट्ट समूहले सहमहामन्त्री चौधरीको नाम हटाउँदै प्रतिनिधिसभा क्षेत्र नम्बर १ बाट प्रत्यक्षतर्फ विजयशंकर यादव, शम्भुबहादुर बुढाथोकी र शैलेन्द्रकुमार फौज्दारको नाम सिफारिस गरेको छ ।

यादव समूहले प्रतिनिधिसभा क्षेत्र नम्बर २ बाट प्रत्यक्षतर्फ राधेचन्द्र यादवको एकल नाम सिफारिस गरेको छ । भट्ट समूहले प्रत्यक्षतर्फ रामअयोध्याप्रसाद यादवको एकल नाम सिफारिस गरेको छ । सभापति यादव पक्षले क्षेत्र नम्बर ३ बाट प्रत्यक्षतर्फ केन्द्रीय सहमहामन्त्री फरमुल्लाह मन्सुरको एकल नाम सिफारिस गरेको छ ।

भट्ट पक्षले मन्सुरसहित तीनजनाको नाम पठाएको छ । सो पक्षले ३ बाट मन्सुर, रामानन्दप्रसाद यादव र प्रभातकुमार चौरसियाको नाम सिफारिस गरेको छ । यादव पक्षले क्षेत्र नम्बर ४ बाट प्रत्यक्षतर्फ शोभाकर पराजुली, सुनिलकुमार गुप्ता कलवार, लालबाबुसिंह भूमिहार, कृष्णब्रत सिंह, इच्छाबहादुर वाग्ले र राजेश्वरप्रसाद चौरसियाको नाम सिफारिस गरेको छ ।

भट्ट समूहले भने क्षेत्र नम्बर ४ बाट प्रत्यक्षतर्फ लालबाबुसिंह भूमिहार, इच्छाबहादुर वाग्ले, कृष्णब्रत सिंह, कपिलदेवप्रसाद यादव र राजेश्वर चौरसियाको नाम सिफारिस गरेको छ ।