माओवादीले टुंग्यायो समानुपातिक उम्मेदवार, पदाधिकारीलाई समानुपातिकबाट बन्चित

 ३ असोज, काठमाडौं । नेकपा माओवादी केन्द्रले समानुपातिकतर्फका उम्मेदवारको नाम टुंगो लगाएको छ । लामो छलफल पछि माओवादीले बन्दसूचीमा पठाउने उम्मेदवारहरुको नाम छनोट गरेको हो । मंसिर ४ मा हुने प्रदेश र प्रतिनिधिसभा निर्वाचनका लागि निर्वाचन आयोगमा बुझाउनुपर्ने समानुपातिक प्रणालीतर्फका उम्मेदवारहरुको नाममा अहिले हस्ताक्षर गर्ने तयारी भइरहेको माओवादीले जनाएको छ ।

समानुपातिकको सूचीमा पदाधिकारीहरुलाई भने राखिएको छैन् । माओवादी केन्द्रीय कार्यालयका अनुसार उम्मेदवारको बन्दसूची तयार भइसकेको छ । अध्यक्ष पुष्पकमल दाहाल प्रचण्ड उपत्यका बाहिर फर्कदा केही ढिलाई भएको हो । अध्यक्ष प्रचण्ड सोलुखुम्बुमा गाउँपालिकाको भवन उद्घाटन गर्न गएका थिए ।

अध्यक्षले हस्ताक्षर नगरेसम्म बन्दसूचीले वैधानिकता नपाउने भएकाले उनलाई कुर्दा आयोग जान ढिला भएको हो । समानुपातिक उम्मेदवारको सूची टुंग्याउन सोमबार बिहान बोलाइएको पदाधिकारी बैठक २ बजेसम्मलाई स्थगित गरेर प्रचण्ड सोलुखुम्बुको दुधकोसी गाउँपालिकाको भवन उद्घाटन गर्न गएका हुन् । अब प्रचण्ड फर्किएको र पदाधिकारी बैठक बसेर समानुपातिक सूची मिलाउन तयारी गरिएको छ ।

माओवादीले महासचिव देव गुरुङको नेतृत्वमा तीन सदस्यीय कार्यदल बनाएको थियो । उक्त कार्यदलले तल्ला कमिटीबाट आएका नाम आइतबार घटाएर ४ सयमा झारेको थियो । माओवादीका अनुसार सोमबार बिहान बसेको कार्यदलको बैठकले ४ सयबाट पनि नाम घटाएर ३३० मा झारेको हो । दलहरुले प्रतिनिधिसभाका लागि ११० र प्रदेशसभाका लागि २२० गरी ३३० जनाको बन्दसूची निर्वाचन आयोगमा सोमबार नै पठाउनुपर्नेछ ।

माओवादीले समानुपातिकमा यसअघिका सांसदलाई नदोहो¥याउने मापदण्ड बनाएको छ । उपाध्यायले पदाधिकारीबाट कोही पनि समानुपातिक सूचीमा नपरेको बताए । माओवादीको पदाधिकारी २१ सदस्यीय छ, जसमध्ये अधिकांश प्रत्यक्ष निर्वाचनमा उम्मेदवार बन्ने तयारीमा छन् । पदाधिकारी बैठकले सूची टुंग्याएपछि माओवादी त्यसलाई बुझाउन आयोग जाने भएको छ ।