निर्वाचन क्षेत्रमै अधिकृतको कार्यालय राख्ने आयोगको निर्णय

४ असोज, काठमाडौं । आगामी प्रतिनिधिसभा तथा प्रदेशसभा सदस्य निर्वाचनका लागि निर्वाचन अधिकृतको कार्यालय सम्बन्धित निर्वाचन क्षेत्रको पायक पर्ने स्थानीय तहमा नै रहने भएको छ । यद्दपि कतिपय निर्वाचन क्षेत्रको कार्यालय सदरमुकाममा समेत तोकिएका छन् । यसअघिका निर्वाचनमा भने जिल्लाको सदरमुकाममा नै मुख्य निर्वाचन अधिकृत र निर्वाचन अधिकृतको कार्यालय स्थापना हुँदै आएको थियो ।

निर्वाचन आयोगले निर्वाचनका लागि आयोगले मुख्य निर्वाचन अधिकृत र निर्वाचन अधिकृतको कार्यालय जिल्लाको सदरमुकाम र सम्बन्धित निर्वाचन क्षेत्रभित्रका स्थानीय तहमा हुने गरी निर्णय गरेको छ । जस अनुसार एक मात्र निर्वाचन क्षेत्र रहेको जिल्लामा सदरमुकाममै निर्वाचन अधिकृतको कार्यालय रहनेछन् । ३५ वटा जिल्लामा एक मात्र प्रतिनिधि सभा क्षेत्र छन् । दुई निर्वाचन क्षेत्र रहेका २१ जिल्लामा सदरमुकामबाहिर १४ वटा निर्वाचन अधिकृतको कार्यालय सम्बन्धित निर्वाचन क्षेत्रको स्थानीय तहमा रहनेछन् ।

तीन निर्वाचन क्षेत्र रहेका सात वटा जिल्लामा भने सदरमुकामबाहिर १२ वटा निर्वाचन अधिकृतको कार्यालय रहने आयोगले जनाएको छ । चार वटा निर्वाचन क्षेत्र रहेका नौ जिल्लामा भने २४ निर्वाचन अधिकृतको कार्यालय सम्बन्धित निर्वाचन क्षेत्रमा रहने निर्णय गरिएको छ ।

पाँच वटा निर्वाचन क्षेत्र रहेका तीन जिल्लामा १२ निर्वाचन अधिकृतको कार्यालय सदरमुकाम बाहिर स्थापना गर्ने निर्णय गरिएको छ । छ वटा निर्वाचन क्षेत्र रहेको मोरङमा भने सदरमुकामबाहिर तीन वटा निर्वाचन अधिकृतको कार्यालय रहनेछन् । दश निर्वाचन क्षेत्र रहेको काठमाडौंमा भने निर्वाचन क्षेत्र नं १ बाहेकका सबै क्षेत्रको निर्वाचन अधिकृतको कार्यालय सदरमुकामबाहिर नै हुनेछन् ।