देउवाको मनोमानीबिरुद्ध आन्दोलनमा उत्रियाे शेखर समूह, १२ गते पार्टी कार्यालयमा धर्ना दिने

१० असोज, काठमाडौं । नेपाली कांग्रेसका सभापति शेरबहादुर देउवा नेतृत्वले हरेक गतिविधिमा मनोमानी गरेपछि वरिष्ठ नेता डा.शेखर कोइराला समूह आन्दोलनमा उत्रिएको छ । कांग्रेस संस्थापन पक्षले प्रतिनिधिसभा र प्रदेशसभा निर्वाचनमा वेवास्ता गरेको भन्दै शेखर समूहले आन्दोलनकाे घोषणा गरेको हाे ।

सभापति देउवाका कारण नै सत्ताको नेतृत्व गरिरहेको दल कांग्रेस निर्वाचनअघि विवादको भूमरीमा छ। मंसिर ४ गते हुने प्रतिनिधिसभा र प्रदेशसभा सदस्यको निर्वाचनका लागि निर्वाचन आयोगमा पेस भएको समानुपातिकतर्फको बन्दसूचीले कांग्रेसमा विवाद चर्किदै गएकाे छ ।

समानुपातिक निर्वाचन प्रणालीको बन्दसूचीमा नेतृत्वले एकलौटी गरेको उनीहरुको आरोप छ । आगामी असोज १२ गते पार्टी कार्यालय सानेपामा धर्ना कार्यक्रम तय गरिएको पार्टीका नेता जगदिश्वर नरसिंह केसीले बताए ।

केसीले भने, ‘हामीले ४० प्रतिशत टिकट नपाए शेरबहादुर देउवा पक्ष एक्लै चुनाव लडोस् । गठबन्धनका पाँच दल मिलाउन १८ घन्टा समय दिने तथा निरन्तर छलफल ६० दिनसम्म गर्नसक्ने सभापतिज्यूले पार्टीलाई एकताबद्ध बनाउन १८ मिनेट पनि समय नदिने? यस्तो पनि हुन्छ ? यसरी एकलौटी तरिकाले अघि बढे गठबन्धनलाई असहयोग गर्छौं।’

सोमबार बिहान बसेको असन्तुष्ट समूहको बैठकले असोज १३ गते खबरदारी सभा गर्ने पनि निर्णय गरेको छ। सो क्रममा शेखर समूहका शीर्ष नेताहरु सहभागी हुनेछन् । माग सम्बोधन नभए अनशन, धर्ना र निर्वाचन बहिष्कारसम्मको योजनामा शेखर समूह छ।

संस्थापन इतर समूहका दोस्रो तहका नेताहरु प्रतिनिधिसभा र प्रदेशसभा निर्वाचनको टिकट वितरणमा ४० प्रतिशत भाग पाउनुपर्ने माग गर्दै दबाबमुलक कार्यक्रम गर्दै आएका छन् ।