असन्तुष्ट पक्षका माग सम्बोधन गर्न देउवा तयार, उम्मेदवारको नामावली तयार गर्दै शेखर समूह

१३ असोज, काठमाडौं । असन्तुष्ट समूहका माग सम्बोधन गर्न नेपाली कांग्रेसका सभापति शेरबहादुर देउवा तयार भएपछि कोइराला समूहका नेताहरु रणनीतिक छलफलमा जुटेका छन् । कांग्रेस वरिष्ठ नेता डा. शेखर कोइराला र महामन्त्री गगन थापासँग बुधबार भएको छुट्टाछुट्टै छलफलपछि प्रधानमन्त्रीसमेत रहेका सभापति देउवाले समानुपातिकतर्फको बन्दसूचीमा भएको त्रुटि सच्याउने र असन्तुष्ट पक्षका मागको उचित सम्बोधन गर्ने आश्वासन दिएपछि कोइराला समूहका नेताहरु रणनीतिक छलफलमा जुटेका हुन् ।

बुधबार कोइराला र थापासँग छुट्टाछुट्टै छलफल गरेका देउवाले आफ्नो पक्षका उम्मेदवारहरुको नामलिष्ट दिन भनेपछि यसैका लागि अहिले वरिष्ठ नेता शेखर कोइराला, महामन्त्री गगन थापा र उपसभापति धनराज गुरुङ लिष्ट तयारीका लागि छलफल गरिरहेका छन् । उनीहरुले आजै आफ्नो पक्षका उम्मेदवारहरुको नामावली सभापति देउवालाई बुझाउने बताइएको छ ।

सभापति देउवाले दिएको आश्वासन कार्यान्यन हुने नहुने भने पक्का भइसकेको छैन् । उनले फेरी धोका दिएमा आगामी दिनमा कसरी अगाडि बढ्ने भन्ने रणनीति बनाउन पनि कोइराला समूहले आन्तरिक छलफललाई तीव्रता दिएको छ । समानुपातिक सूची सच्याउनुपर्ने, प्रत्यक्षमा कम्तिमा पनि ५० जनालाई टिकट दिनुपर्ने लगायतका विषयमा बुधबार देउवासँग छलफल भएको थियो ।

गत शनिबार उपसभापति धनराज गुरुङ आफैले सभापति शेरबहादुर देउवासँग समय मागी मध्यरातमा बालुवाटारमा भेटवार्ता गरि आफ्नो समुहको स्पष्ट अडान राखेका थिए । शेखर समुहलाई ४० प्रतिशत सीट नदिए परिणाम गम्भीर हुने उपसभापति गुरुङको चेतावनी र खबरदारी सभामार्फत नेता गुरुराज घिमिरेलगायतले कडा शब्दमा धम्क्याएपछि देउवा थप गलेका हुन् ।

सो समूहले आज (बिहीबार) विहान काठमाडौंमा चियापान समारोहको आयोजनासमेत गरेको थियो । चियापान समारोहबाट तीन नेता निस्किएर छलफलमा जुटेको बताइएको छ । यो समूहले सभापति देउवासँग प्रत्यक्षमा ५० र समानुपातिकमा ६१ सीटको दावी गरेको छ । प्रदेशमा पनि यहीअनुसार सीट दिनुपर्ने माग रहेको छ । तर सभापति देउवाले प्रत्यक्षमा ३८ र समानुपातिकमा ४१ सीट दिन भने राजी भैसकेकाे बुझिएकाे छ ।

यता, कांग्रेसभित्र उत्पन्न विवादलाई लिएर सभा गठबन्धनमा पनि बहस सुरु भएको छ । कोइराला समूहले गठबन्धनमा रहेका दलका नेताहरुसँग छलफल गर्दै उचित संख्या नपाए गठबन्धनलाई नसघाउने भन्दै अन्य दलमाथि दवाव बनाएपछि गठबन्धनभित्रै यस विषयले प्रवेश पाएको हो । कांग्रेसको असन्तुष्ट समूहले सीट बाँडफाँडमा आफ्नो समूहलाई नसमेटे गठबन्धनलाई असहयोग गर्ने चेतावनी दिएको छ ।

गठबन्धनका नेताहलाई दवाव दिएपछि नेकपा माओवादीका अध्यक्ष पुष्पकमल दाहाल‘प्रचण्ड’ र नेकपा एकीकृत समाजवादीका अध्यक्ष माधवकुमार नेपालले प्रधानमन्त्रीसमेत रहेका कांग्रेस सभापति देउवासँग असन्तुष्ट पक्षका मागका विषयमा छलफल गरेका थिए । उनीहरुले देउवालाई पार्टीको विवाद तत्काल मिलाउन दवाव दिएपछि देउवाले कोइराला र थापालाई छुट्टाछुट्टै भेटेर छलफल गरेका थिए ।

बुधबार बिहान कांग्रेस महामन्त्री थापाले खुमलटार पुगेर कांग्रेस विवाद र गठबन्धनमा पर्न सक्ने असरबारे प्रचण्डसँग छलफल गरेका थिए ।अध्यक्ष प्रचण्डले कांग्रेसको आन्तरिक विवाद र निर्वाचनमा गठबन्धनको विषयमा चासो राखेका थिए । पार्टीभित्रको आन्तरिक विवाद नमिलाईकन दलका बीचमा मात्रै गठबन्धन गर्दा त्यसले राम्रो परिणाम नदिने भन्दै थापाले देउवासँग वार्ता गर्न प्रचण्डलाई दवाव दिएका थिए ।

भेटमा महामन्त्री थापाले गठबन्धनमा सहमति भएका भनिएका अधिकांश स्थान आफ्नो समूहले दाबी गरेका र जित्ने आधार भएका स्थान रहेकाले त्यसको असर निर्वाचनमा पर्न सक्नेतर्फ संकेत गरेका थिए । उनले कांग्रेस बलियो भएका क्षेत्रहरू माओवादी र एकीकृत समाजवादीलाई दिइएको भन्दै यसलाई सम्बोधन नगरी जाँदा निर्वाचनमा असर देखिन सक्ने तर्फ प्रचण्डलाई सचेत गराएका थिए ।थापासँगको भेटपछि प्रचण्ड र देउवाबीच भएको छलफलमा पनि देउवाले आफूले पार्टीको आन्तरिक विवाद मिलाएर जाने भन्दै गठबन्धनमा कुनै असर नपर्ने जनाएका थिए ।

प्रचण्डसँगको भेटपछि देउवाले महामन्त्री थापालाई बालुवाटारमा बोलाएर आफू पार्टीभित्रको समस्या समाधान गरेर जान तयार रहेको भन्दै गठबन्धनलाई असर पर्ने गतिविधि नगर्न सचेत गराएका थिए । जवाफमा महामन्त्री थापाले आफ्नो समूहलाई निर्वाचनमा न्याय नगरे अपेक्षाकृत परिणाम नआउने भन्दै अडान कायम रहेको बताएका थिए । असन्तुष्ट समूहका नेतासँगको भेटमा देउवाले सबै पक्षलाई मिलाएर लान आफू तयार रहेको बताएपछि कोइराला समूह आन्तरिक छलफलमा लागेको हो ।

समानुपातिकको बन्दसूचीको विषयलाई लिएर पछिल्लो समय इतर समूहले दवावमूलक गतिविधि गर्दै आएको छ । यसैको निरन्तरतास्वरूप बुधबार इतर समूहका दोस्रो तहका नेताहरूको सहभागितामा पार्टी कार्यालय सानेपामा एक घन्टा मौन धर्ना भएको थियो । आजको चियापान पनि यसैको निरन्तरता भएको बताइएको छ ।