कांग्रेसमा असन्तुष्ट पक्षको आज अन्तिम अल्टिमेटमः बिद्रोह भए देउवा शुन्य, ओली मालामाल !

१५ असोज, काठमाडौं । संस्थापन पक्षका कारण नेपाली कांग्रेसभित्रको विवाद उत्कर्षमा पुगेको छ । समानुपातिक र प्रत्यक्षतर्फ आज शनिबारभित्र सम्मानजनक भाग नपाए असन्तुष्ट भनिएको डा. शेखर कोइराला समूहले चुनाव बहिस्कारसम्मको विद्रोह गर्ने रणनीति बनाएको छ । कांग्रेसभित्रको विद्रोहले सत्ता गठबन्धन विभाजन गर्न नसकेको एमालेको नेतृत्व गरिरहेका केपी शर्मा ओली मालामाल हुने देखिएको छ ।

कांग्रेस विद्रोहले सत्ता गठबन्धनमा रहेका दलहरुलाई समेत प्रत्यक्ष प्रभाव पार्ने निश्चित छ । कांग्रेस संस्थापन समूहले कोइराला समूहका मागलाई सम्मानजनक ढंगले सम्बोधन नगरे गठबन्धनलाई नसघाउने निश्चित छ । यो विवादले गठबन्धनमा रहेका दलहरुमा समेत विभाजन आएर कांग्रेस संस्थापन समूह एक्लै चुनावमा जानुपर्ने अवस्थासमेत खडा गर्ने देखिएको छ ।

कांग्रेसमा प्रधानमन्त्रीसमेत रहेका सभापति शेरबहादुर देउवाले महाधिवेशनका सहयोगी नेता–कार्यकर्तालाई मात्रै टिकट वितरण गर्न खोजेको भन्दै कोइराला नेतृत्वको समूहले विरोधका कार्यक्रम घोषण गरेको छ । कोइराला समूहले पार्टीभित्र सबै नेता–कार्यकर्तालाई योगदानमा आधारित भएर समान अवसर र न्यायपूर्ण व्यवहार गर्न माग गर्दै विरोध र धर्नाका गतिविधि गर्न थालेपछि कांग्रेसमा अन्तरद्वन्द्व चुलिएको हो ।

कोइराला समूहले समानुपातिकतर्फको सूची सच्याउनुपर्नेदेखि प्रत्यक्षतर्फको टिकट वितरण न्यायोचित हुनुपर्नेसम्मका माग राखेको छ । दुई सातायता दिनहुँजसो गुटगत बैठक, छलफल र विरोधसभा गरिरहेका नेता–कार्यकर्ताले संस्थापन पक्षप्रति आक्रोश पोखेका छन् । कोइराला समूहले पार्टीभित्र अवसरको बाँडफाँट र वितरण गर्दा सभापति देउवाले महाधिवेशनमा आफूलाई भोट हाल्नेलाई प्राथमिकता दिएको बताएको छ ।

देउवाले समानुपातिक बन्दसूची सच्याउने र प्रत्यक्षतर्फको टिकट वितरणमा समेत मिलाएर अघि बढ्ने बचन दिएका थिए । तर, शुक्रबारसम्म माग सम्बानेधनका लागि कुनै प्रयास भएन् । देउवाले सम्बोधन गर्ने आश्वासन दिएपछि नेता कोइराला आशावादी देखिएका थिए । तर महामन्त्री थापासहित दोस्रो पुस्ताका नेताहरू देउवाले आस देखाउने, काम नगर्ने भन्दै विद्रोहको तयारीमा जुट्नुपर्ने पक्षमा देखिएका छन् ।

महामन्त्री थापाले शुक्रबार सार्वजनिक रूपमै सभापति देउवाप्रतिको त्यस्तो निराशा पोखे । उनले चुनाव जित्नकै लागि मात्रै हुन लागेको गठबन्धन निरर्थक रहेको दाबी गरे । महामन्त्री थापाले परिणाममुखी राजनीतिका लागि अहिले पार्टी भित्रै विद्रोह गर्नुपर्ने परिस्थिति बनिरहेको बताएका थिए । कोइरालाले सभापति देउवासँग आफूले निश्चित प्रतिशत वा सीट संख्या पाउनुपर्ने भनेर भागबन्डा गर्न भनेका छैनन् तर उनी पक्षीय नेताहरूले भागबन्डा मागेर जानुपर्ने भन्दै कोइरालामाथि दवाव बनाइरहेका छन् ।

गठबन्धनमा पनि कांग्रेसले ८५ सीट लिए आफूहरूले कम्तीमा ३५ सीट पाउनुपर्ने कोइराला समूहका नेताहरूको भनाइ छ । कोइराला समूहबाट नेता कोइराला, उपसभापति धनराज गुरुङ, महामन्त्री थापा, सहमहामन्त्री बद्री पाण्डेलगायत केही नेताबाहेक सबैजसो नेताहरूको टिकट जोखिममा देखिएपछि आगामी चुनावमा कांग्रेसभित्र विद्रहको सम्भावना थप बढाएको छ ।

कांग्रेसको विधानअनुसार केन्द्रीय संसदीय समितिले उम्मेदवार चयन गर्छ । संसदीय समिति नै अपुरो छ । २५ सदस्य हुनुपर्ने समितिमा अहिले १४ जना मात्रै छन् । सभापति देउवाले पदाधिकारीबाहेक रामचन्द्र पौडेललाई मात्रै समितिमा मनोनीत गरेका छन् । तर, सभापतिका प्रत्यासी कोइरालालाई राखेका छैनन् ।

यता, नेकपा एमालेका अध्यक्ष ओलीले पनि का्रग्रेसमा विद्रोह चाहेका छन् । कांग्रेसमा विद्रोह भए गठबन्धनमा रहेका दलहरुले चुनावमा राम्रो नतिजा लइाउन नसक्ने र यसको फाइदा एमालेलाई हुने अनमान ओलीको छ । उनले औपचारिक रुपमा कांग्रेसको असन्तुष्ट समूहसँग मिलेर निर्वाचनमा जाने बताइसकेका छन् । उनले राप्रपा र लोसपासँग पनि यही कारणले चुनावी सहकार्यको अन्तिम निर्णय लिएका छैनन् ।